جہلم: وزیر مملکت برائے خزانہ و ریلوے بلال اظہر کیانی کریم پور پہنچے اور اسلام آباد جوڈیشل کمپلیکس خودکش حملے میں شہید ہونے والے سید سجاد حسین شاہ کے اہل خانہ سے تعزیت کی۔ اس موقع پر فاتحہ خوانی بھی کی گئی۔
بلال اظہر کیانی نے شہید کے اہل خانہ کو وزیراعظم کا تعزیتی پیغام پہنچایا اور یقین دہانی کروائی کہ دیگر شہداء کی طرح سید سجاد حسین شاہ کے اہل خانہ کو بھی شہید پیکج فراہم کیا جائے گا۔ انہوں نے کہا کہ ریاست شہید کے بچوں کی مکمل دیکھ بھال کرے گی۔
وزیر مملکت نے ضلعی انتظامیہ اور پولیس کو ہدایت دی کہ شہید کے خاندان کے ساتھ مکمل تعاون یقینی بنایا جائے۔ بلال اظہر کیانی نے کہا کہ جہلم شہیدوں اور غازیوں کی سرزمین ہے اور دہشت گرد اسلام اور انسانیت دونوں کو بدنام کر رہے ہیں۔
انہوں نے مزید کہا کہ وزیراعظم شہباز شریف اور فیلڈ مارشل سید عاصم منیر دہشت گردی کے خاتمے کے لیے پختہ عزم رکھتے ہیں اور قوم کی قربانیوں کے نتیجے میں پاکستان سے دہشت گردی کا مکمل خاتمہ ممکن ہوگا۔
