دوحا میں منعقدہ عالمی تعلیمی مقابلے "ورلڈ اسکالر کپ” کے گلوبل راؤنڈ میں ایچیسن کالج لاہور کے تین طالب علموں نے 92 میڈلز اور 11 ٹرافیوں کے ساتھ پاکستان کے لیے تیسری پوزیشن حاصل کی۔
لاہور کے معروف تعلیمی ادارے ایچیسن کالج کے طالب علموں نے عالمی سطح پر پاکستان کا نام روشن کر دیا ہے۔ قطر کے دارالحکومت دوحا میں ہونے والے "ورلڈ اسکالر کپ” کے گلوبل راؤنڈ میں پاکستانی طالب علموں نے شاندار کارکردگی کا مظاہرہ کرتے ہوئے تیسری پوزیشن حاصل کر لی۔
11 سے 17 جون تک جاری رہنے والے اس بین الاقوامی مقابلے میں دنیا بھر کے 50 سے زائد ممالک کے 1700 سے زیادہ طلباء نے شرکت کی۔ ان مقابلوں میں کوئز، مباحثہ (ڈیبیٹ)، اور تحریری اظہار جیسے علمی اور ذہنی صلاحیتوں کے شعبے شامل تھے۔
پاکستان کی نمائندگی کرنے والے طلباء ابراہیم عثمان اجمل، محمد احمد ذوالفقار اور حسین اسلم بھنڈر نے مجموعی طور پر 92 میڈلز اور 11 ٹرافیاں اپنے نام کیں۔ یہ پہلا موقع ہے کہ پاکستانی طالب علموں نے اس مقابلے کے گلوبل راؤنڈ میں اتنی بڑی کامیابی حاصل کی ہو۔
ایچیسن کالج کے ان ہونہار طالب علموں کی یہ کامیابی محض انفرادی سطح پر نہیں بلکہ پوری قوم کے لیے فخر کا باعث ہے۔ تینوں طلباء آئندہ مرحلے میں امریکا کی ییل یونیورسٹی میں منعقد ہونے والے "چیمپئنز ٹورنامنٹ” میں بھی پاکستان کی نمائندگی کریں گے۔
یاد رہے کہ "ورلڈ اسکالر کپ” ایک بین الاقوامی تعلیمی مقابلہ ہے جو دنیا کے مختلف خطوں سے ذہین ترین طلباء کو ایک پلیٹ فارم پر جمع کرتا ہے۔ اس مقابلے کا مقصد علم، تنقیدی سوچ اور بین الاقوامی ہم آہنگی کو فروغ دینا ہے۔ پاکستانی طلباء کی حالیہ شمولیت اور نمایاں کامیابی ملک میں تعلیمی قابلیت اور عالمی سطح پر ان کے روشن مستقبل کی دلیل ہے۔
