شمالی وزیرستان میں سیکیورٹی صورتحال کے پیش نظر صبح 6 بجے سے شام 6 بجے تک کرفیو نافذ کر دیا گیا، داخلی و خارجی راستے بند، شہریوں کو گھروں میں رہنے کی ہدایت۔
شمالی وزیرستان، خیبرپختونخوا کے حساس قبائلی ضلع شمالی وزیرستان میں سیکیورٹی خدشات کے باعث آج صبح 6 بجے سے شام 6 بجے تک کرفیو نافذ کر دیا گیا ہے۔ ضلعی انتظامیہ کی جانب سے جاری کردہ نوٹیفکیشن کے مطابق یہ اقدام موجودہ سیکیورٹی صورتحال کو مدنظر رکھتے ہوئے کیا گیا ہے تاکہ کسی بھی ممکنہ ناخوشگوار واقعے سے بچا جا سکے اور امن و امان کی صورتحال کو یقینی بنایا جا سکے۔
کرفیو کے نفاذ کے بعد شمالی وزیرستان کے تمام داخلی و خارجی راستے بند کر دیے گئے ہیں اور ہر قسم کی عام ٹریفک پر پابندی عائد کر دی گئی ہے۔ ضلعی انتظامیہ نے شہریوں سے اپیل کی ہے کہ وہ غیر ضروری طور پر گھروں سے باہر نہ نکلیں اور امن و امان کے قیام میں انتظامیہ اور سیکیورٹی اداروں کے ساتھ مکمل تعاون کریں۔ مقامی پولیس اور سیکیورٹی فورسز نے علاقے میں گشت بھی بڑھا دیا ہے تاکہ کسی بھی ممکنہ خطرے سے بروقت نمٹا جا سکے۔
ضلعی حکام کا کہنا ہے کہ یہ فیصلہ علاقے میں موجود ممکنہ سیکیورٹی خطرات اور حساس اطلاعات کی بنیاد پر کیا گیا ہے۔ اگر حالات بہتر رہے تو کرفیو میں نرمی یا مکمل خاتمہ جلد ممکن ہے، تاہم موجودہ صورتحال کے پیش نظر شہریوں سے احتیاط برتنے کی سختی سے اپیل کی گئی ہے۔
یاد رہے کہ شمالی وزیرستان ماضی میں دہشتگردی، شدت پسندی اور ٹارگٹ کلنگ جیسے واقعات کا مرکز رہا ہے۔ سیکیورٹی فورسز کی جانب سے متعدد فوجی آپریشنز کے باوجود بعض عناصر کی موجودگی کی اطلاعات کے باعث وقتاً فوقتاً اس قسم کے اقدامات کیے جاتے ہیں تاکہ علاقے میں دیرپا امن قائم رکھا جا سکے۔
