سعودی عرب نے پاکستان، بھارت، بنگلہ دیش اور مصر سمیت 14 ممالک کے شہریوں کے لیے تمام بلاک ورک ویزوں کا اجرا عارضی طور پر معطل کر دیا ہے۔ یہ پابندی جون 2025 کے اختتام تک برقرار رہے گی، جس سے ہزاروں غیر ملکی کارکن اور کاروباری ادارے متاثر ہونے کا امکان ہے۔
سعودی وزارتِ افرادی قوت و سماجی بہبود کی جانب سے جاری کردہ اعلامیے کے مطابق، اس اقدام کا مقصد حج سیزن کے دوران زائرین کی آمدورفت کو منظم کرنا اور داخلی امور کو بہتر طریقے سے سنبھالنا ہے۔
متاثرہ ممالک کی فہرست:
پاکستان
بھارت
بنگلہ دیش
مصر
انڈونیشیا
عراق
نائیجیریا
اردن
الجزائر
سوڈان
ایتھوپیا
تیونس
یمن
مراکش
سعودی حکام نے بلاک ورک ویزا کے ساتھ ساتھ ان ممالک کے لیے عمرہ، فیملی وزٹ، بزنس، اور ٹورسٹ ویزے بھی وقتی طور پر روکنے کا فیصلہ کیا ہے۔
ذرائع کا کہنا ہے کہ یہ عارضی پابندیاں سعودی عرب کی حج و عمرہ پالیسی میں رد و بدل اور سیکیورٹی و انتظامی بہتری کے تحت کی گئی ہیں، اور حج سیزن کے اختتام کے بعد ویزوں کی بحالی کا امکان ہے۔
اس فیصلے سے ان ممالک کے لاکھوں افراد متاثر ہو سکتے ہیں جو سعودی عرب میں ملازمت یا کاروباری مواقع تلاش کر رہے تھے۔ خاص طور پر تعمیراتی، صنعتی اور گھریلو ملازمین کی مانگ رکھنے والے سعودی آجر بھی قلیل المدتی مشکلات کا شکار ہو سکتے ہیں۔
حکام نے واضح کیا ہے کہ یہ اقدام مستقل نہیں بلکہ وقتی نوعیت کا ہے، جسے حالات کے مطابق مستقبل میں نرم کیا جا سکتا ہے۔
