نائب وزیراعظم اسحاق ڈار کا کہنا ہے کہ تحریک انصاف نے 9 مئی کو تمام ریڈ لائنیں عبور کیں، ان کے جیسا مفاہمت والا کچھ نہیں کرسکتا جب تک ان کا فیصلہ نہ ہو۔
سینیٹ میں خطاب کے دوران نائب وزیراعظم اسحاق ڈار نے کہا کہ پی ٹی آئی نے 24 نومبر کو ایک اور 9 مئی کر دیا ہے، ملک کو بدنام کرنا بند کریں، جو بندے مارے گئے آپ ان کے شناختی کارڈ دکھا دیں، ساتھ چل کر تحقیقات کراتے ہیں، ڈیتھ سرٹیفکیٹ ایشو کراتے ہیں۔
نائب وزیراعظم نے کہا کہ نہ انہوں نے 2018 میں اور نہ 2024 میں کچھ کیا، ہم الیکشن میں میدان میں تھے کہ ہم مل کر راستہ نکالیں۔
اسحاق ڈار کا کہنا تھا کہ حکومت نے کسی پر مقدمہ نہیں بنایا، سابق وزیراعظم عمران خان کو عدالتیں ریلیف بھی دے رہی ہیں جو ریلیف ان کو ملتا ہے ان کو ملنا چاہیے۔
سینیٹ اجلاس میں خطاب کرتے ہوئے رہنما پی ٹی آئی سینیٹر شبلی فراز کا کہنا ہے کہ ہمارے سیاسی اختلاف ہونے چاہییں لیکن ہم اس کو ذاتی دشمنی کے بھنیٹ نہیں چڑھا سکتے۔
سینیٹر کا کہنا تھا کہ یہ ملک ہمارا ہے ہر ایشو کو سیاست کی بھینٹ چڑھانے کی بجائے ہمیں ایک دوسرے سے تعاون کرنا ہے۔
واضح رہے کہ اس سے پہلے خبر سامنے آئی تھی کہ وفاقی حکومت اور پاکستان تحریک انصاف کے درمیان رابطے بحال ہوگئے ہیں۔
اسپیکر قومی اسمبلی ایاز صادق سے پی ٹی آئی رہنماؤں نے اسپیکر ہاؤس میں ملاقات کی جس میں بیرسٹر گوہر، عمر ایوب، صاحبزادہ حامد رضا اور وزیر قانون و پارلیمانی امور اعظم نذیر تارڑ بھی موجود تھے۔
