لاہور، وزیر اطلاعات پنجاب عظمیٰ بخاری کا کہنا ہے کہ سابق وزیراعظم عمران خان اور انکی اہلیہ بشریٰ بی بی کی ناکام بغاوت کے تمام ثبوت سامنے آگئے۔
اپنے ایک بیان میں صوبائی وزیر عظمیٰ بخاری نے کہا کہ آئی جی اسلام آباد، سیکرٹری داخلہ اور ڈی پی او اٹک کی پریس کانفرنسز ناقابل تردید شواہد ہیں۔ عمران خان اور بشریٰ بی بی کی 26 نومبر کی ناکام بغاوت کے تمام ثبوت سامنے آگئے ہیں، سکیورٹی فورسز پر حملوں کیلئے غیر ملکیوں کو احتجاج میں لایا گیا۔
عظمیٰ بخاری کا کہنا تھا کہ احتجاج میں شریک افراد تربیت یافتہ اور تخریب کاری کے ماہر تھے، زیر حراست افراد کی اکثریت کا پاکستان میں کوئی ریکارڈ ہی نہیں، خیبرپختونخوا حکومت کے پاس دہشتگردوں سے لڑنے کیلئے اسلحہ نہیں لیکن فیڈریشن پر چڑھائی کیلئے جدید اسلحہ ہے۔
سینئر صوبائی وزیر کا کہنا تھا کہ نعشوں کی سیاست کرنیوالے اب تک درجن بھر بیانات تبدیل کر چکے ہیں۔
عظمیٰ بخاری کا کہنا تھا کہ فتنہ پارٹی کا سوشل میڈیا ہی اس کیلئے وبال جان بن چکا ہے، اب وقت آگیا ہے ملک میں سوشل میڈیا کو ہر سطح پر ریگولرائز کیا جائے، جنہوں نے انقلاب لانا تھا اب وہ ایک دوسرے پر ٹاؤٹ اور جاسوسی کے الزامات لگا رہے ہیں۔
دوسری جانب حکومت کی جانب سے ملک میں فسادات و ہنگامہ آرائی سے نمٹنے کے لیے عالمی معیار کی انسداد فسادات فورس تشکیل دینے کا فیصلہ کرلیا گیا۔
