امریکا نے یوکرین کو روسی حملوں سے بچانے کے لیے 179 ملین ڈالر مالیت کے جدید فضائی دفاعی نظام فراہم کرنے کی منظوری دے دی ہے۔ اس فیصلے کی تصدیق امریکی محکمہ خارجہ کی جانب سے کی گئی ہے۔
حکام کے مطابق، یوکرین کو پیٹریاٹ ایئر ڈیفنس سسٹم فروخت کرنے کا منصوبہ تیار کیا گیا ہے، جو روس کے میزائل اور فضائی حملوں کا مؤثر جواب دینے کی صلاحیت رکھتا ہے۔ یہ سودا ایسے وقت میں سامنے آیا ہے جب یوکرین میں جنگی حالات بدستور جاری ہیں اور روس کی جانب سے فوجی دباؤ میں کمی نہیں آئی۔
یاد رہے کہ گزشتہ ماہ امریکی صدر ڈونلڈ ٹرمپ نے اعلان کیا تھا کہ یوکرین کو پیٹریاٹ سسٹمز فراہم کیے جائیں گے، تاکہ وہ اپنی فضائی حدود کا بہتر دفاع کر سکے۔ اس منصوبے کے تحت نیٹو اتحادی ممالک بھی اس دفاعی پیکیج میں مالی تعاون فراہم کریں گے۔
ناروے کا یوکرین کیلئے 7 ارب کراؤن مالیت کا فضائی دفاعی پیکج
ماہرین کا کہنا ہے کہ پیٹریاٹ ڈیفنس سسٹم یوکرین کی فضائی صلاحیت میں نمایاں بہتری لا سکتا ہے، تاہم اس کی مؤثر تنصیب اور تربیت کے لیے وقت درکار ہوگا۔ دوسری جانب روس نے ابھی تک اس سودے پر کوئی باضابطہ ردعمل ظاہر نہیں کیا، تاہم ممکنہ ردعمل میں تناؤ میں اضافے کا خدشہ ظاہر کیا جا رہا ہے۔
