وینزویلا پر ممکنہ امریکی فوجی کارروائی کے بعد ایک تازہ سروے سے معلوم ہوا ہے کہ امریکی عوام میں اس اقدام کے حوالے سے بڑی حد تک تحفظات پائے جاتے ہیں۔ خبر ایجنسی کے سروے کے مطابق صرف 33 فیصد امریکی وینزویلا پر امریکی حملے کے حامی ہیں، جبکہ 72 فیصد امریکی شہریوں کا کہنا ہے کہ امریکہ وینزویلا میں حد سے زیادہ ملوث ہو سکتا ہے اور اس سے خطے میں غیر ضروری کشیدگی پیدا ہو سکتی ہے۔
سروے میں سیاسی جماعتوں کے درمیان رائے کے واضح اختلافات بھی سامنے آئے ہیں۔ ری پبلکن ووٹرز میں 65 فیصد امریکی آپریشن کے حق میں ہیں، جب کہ ڈیموکریٹس میں یہ شرح محض 11 فیصد اور آزاد ووٹرز میں 23 فیصد ریکارڈ کی گئی ہے۔ ماہرین کے مطابق یہ اعداد و شمار اس بات کی عکاسی کرتے ہیں کہ سیاسی وابستگی امریکی عوام کی رائے پر نمایاں اثر ڈالتی ہے، اور زیادہ تر ڈیموکریٹس اور آزاد ووٹرز اس معاملے میں محتاط رویہ اختیار کر رہے ہیں۔
سروے کے نتائج ایسے وقت سامنے آئے ہیں جب امریکی حکام وینزویلا کی قیادت کے مستقبل کے حوالے سے تیاری کر رہے ہیں۔ ذرائع کے مطابق سی آئی اے نے وینزویلا میں حکومت کے وفادار عناصر میں سب سے موزوں افراد سے متعلق ایک رپورٹ صدر ٹرمپ کو پیش کی ہے۔ اس رپورٹ میں قائم مقام صدر Delcy Rodriguez کا نام شامل ہے، جنہیں وینزویلا میں سیاسی استحکام برقرار رکھنے کے لیے سب سے موزوں سمجھا جا رہا ہے۔ امریکی حکام کا کہنا ہے کہ یہ اقدامات اس بات کو یقینی بنانے کے لیے کیے جا رہے ہیں کہ کسی بھی ممکنہ بحران کی صورت میں خطے میں استحکام برقرار رہے۔
وینزویلا کے بعد: ٹرمپ کے ممکنہ اگلے ہدف کون سے ممالک ہو سکتے ہیں؟
ماہرین کا کہنا ہے کہ امریکی عوام کی جانب سے وینزویلا میں فوجی کارروائی کے حوالے سے مخالفت اور محتاط رویہ حکومت کے لیے اہم پیغام ہے۔ سروے کے مطابق شہری چاہتے ہیں کہ امریکہ زیادہ جارحانہ اقدام کی بجائے سفارتی اور سیاسی حل کی طرف توجہ دے۔ اس سروے کے نتائج امریکی خارجہ پالیسی سازوں کے لیے ایک انتباہ کے طور پر سامنے آئے ہیں کہ عوامی رائے کو نظر انداز کرنا سیاسی اعتبار سے مہنگا پڑ سکتا ہے۔
یہ سروے اور سی آئی اے کی رپورٹ دونوں اس بات کو واضح کرتے ہیں کہ وینزویلا کے حوالے سے امریکی حکومت کو محتاط رویہ اختیار کرنا ہوگا، اور ممکنہ فوجی آپریشن کے فیصلے میں عوامی اور سیاسی اثرات کو بھی مدنظر رکھا جائے گا۔
