تہران: ایران نے امریکی فضائی حملوں کے بعد شدید ردِعمل کا اظہار کرتے ہوئے نہ صرف آبنائے ہرمز بند کرنے کا عندیہ دیا ہے بلکہ مشرقِ وسطیٰ میں موجود امریکی فوجی اثاثوں کو نشانہ بنانے کا بھی اعلان کر دیا ہے۔ ایرانی قیادت نے خبردار کیا ہے کہ امریکا کو جلد ہی اپنی کارروائیوں کی بھاری قیمت چکانا پڑے گی۔
ایرانی پاسدارانِ انقلاب نے واضح کیا ہے کہ اب جنگ کا آغاز ہو چکا ہے اور خطے میں موجود ہر امریکی فوجی یا شہری ممکنہ ہدف ہے۔ تنظیم کے ترجمان نے دعویٰ کیا کہ یورپی یونین کا کوئی بحری جہاز بحفاظت یورپ نہیں پہنچ سکے گا۔
سپریم لیڈر کا سخت مؤقف
ایران کے سپریم لیڈر آیت اللہ خامنہ ای نے سوشل میڈیا پلیٹ فارم ٹیلیگرام پر بیان دیتے ہوئے کہا کہ: "امریکا نے جنگ کا دروازہ خود کھولا ہے اور اسے جو نقصان اٹھانا پڑے گا وہ ایران کو پہنچنے والے نقصان سے کہیں زیادہ ہوگا۔”
ایران نے اقوامِ متحدہ سے رجوع کرلیا
ایران نے اقوامِ متحدہ کی سلامتی کونسل کا ہنگامی اجلاس بلانے کا مطالبہ کر دیا ہے، اور اپنے بیان میں امریکی حملوں کو بین الاقوامی قوانین کی سنگین خلاف ورزی قرار دیا ہے۔ ایرانی مشن نے چارٹر آف دی یونائیٹڈ نیشنز کے تحت فوری اور سخت اقدام کا تقاضا کیا ہے۔
ایرانی وزیر خارجہ کی مذمت
ایران کے وزیر خارجہ عباس عراقچی نے بھی امریکی حملوں پر شدید ردعمل دیتے ہوئے کہا: "یہ حملے نہ صرف اشتعال انگیز ہیں بلکہ عالمی امن کے لیے خطرہ بن سکتے ہیں۔ ایران اپنی خودمختاری اور مفادات کے تحفظ کے لیے ہر ممکن راستہ اختیار کرے گا۔”
ایرانی وزیر خارجہ کی مذمت
حوثی تنظیم کا ردِعمل
یمن کی حوثی تنظیم انصار اللّٰہ نے ایران پر امریکی حملے کو جنگ کی ابتدا قرار دیا ہے۔ تنظیم کے رہنما محمد الفرح نے کہا کہ: "ایران کی جوہری تنصیبات کو نشانہ بنا کر امریکا نے دشمنی کی انتہا کر دی ہے، اب پسپا ہونے کا وقت ختم ہو چکا ہے۔”
جوہری تنصیبات محفوظ، تابکاری کا کوئی خطرہ نہیں
ایرانی حکام کے مطابق امریکی حملوں سے قبل ہی فردو، نطنز اور اصفہان کی جوہری تنصیبات کو خالی کرا لیا گیا تھا۔ حکومتی عہدیداروں نے واضح کیا کہ حملے سے تابکاری کے اخراج کا کوئی اندیشہ نہیں ہے، اور قم سمیت متاثرہ علاقوں کے شہری محفوظ ہیں۔
ایرانی پارلیمنٹ کے رکن اور جوہری ادارے کے نمائندوں نے تصدیق کی کہ زیرِ زمین تنصیبات کو کوئی بڑا نقصان نہیں پہنچا اور زیادہ تر تباہی زمین کی سطح پر موجود ڈھانچوں کو ہوئی ہے، جو قابلِ مرمت ہے۔
جوہری تنصیبات محفوظ، تابکاری کا کوئی خطرہ نہیں
ایرانی جوہری ادارے کا دوٹوک پیغام
ایران کی جوہری توانائی تنظیم نے بیان میں واضح کیا ہے کہ: "ایران کے جوہری ماہرین ہر قسم کی رکاوٹوں کے باوجود اپنی پیش رفت جاری رکھیں گے۔ یہ ہمارا قومی فریضہ اور ہمارے شہداء کی قربانیوں کا تسلسل ہے۔”
حماس کی مذمت
فلسطینی تنظیم حماس نے بھی امریکی حملوں کی شدید الفاظ میں مذمت کرتے ہوئے کہا ہے کہ: "یہ جارحیت بین الاقوامی امن کے لیے براہِ راست خطرہ ہے اور خطے میں کشیدگی کو خطرناک حد تک بڑھا سکتی ہے۔”
