پونے کے موشی گاربیج ڈپو میں پیش آنے والے حادثے کے بعد متعدد افراد کچرے تلے دب گئے، ریسکیو اداروں اور فوج نے امدادی کارروائیاں شروع کر دیں۔
بھارت کی ریاست مہاراشٹر کے شہر پونے میں ایک افسوسناک حادثے کے دوران کچرے کا ایک بڑا ڈھیر انتظامی عمارت پر آ گرا، جس کے نتیجے میں کم از کم 8 افراد ہلاک ہو گئے، جبکہ متعدد افراد ملبے اور کچرے تلے دب گئے۔ بھارتی حکام کے مطابق امدادی کارروائیاں جاری ہیں اور لاپتا افراد کی تلاش کے لیے ریسکیو ٹیمیں مسلسل کام کر رہی ہیں۔
بھارتی میڈیا کے مطابق یہ حادثہ پمپری چنچواڑ میونسپل کارپوریشن کے زیرِ انتظام موشی گاربیج ڈپو میں پیش آیا، جہاں کچرے کو توانائی میں تبدیل کرنے کے منصوبے کے تحت بڑی مقدار میں فضلہ جمع کیا گیا تھا۔
23 افراد کچرے تلے دب گئے
رپورٹس کے مطابق حادثے کے وقت مجموعی طور پر 23 افراد متاثر ہوئے تھے۔ ان میں سے 22 افراد انتظامی عمارت کے اندر موجود تھے، جبکہ ایک شخص عمارت کے باہر کچرے کے نیچے دب گیا۔
حکام کے مطابق خوش قسمتی سے 5 افراد حادثے کے فوراً بعد اپنی مدد آپ کے تحت محفوظ مقام پر منتقل ہونے میں کامیاب ہو گئے، جبکہ دیگر متاثرین کو نکالنے کے لیے فوری طور پر امدادی کارروائیاں شروع کی گئیں۔
فوج اور ریسکیو اداروں کی مشترکہ کارروائیاں
حادثے کی اطلاع ملتے ہی مقامی انتظامیہ، ریسکیو ٹیموں اور دیگر متعلقہ اداروں نے موقع پر پہنچ کر سرچ اینڈ ریسکیو آپریشن شروع کر دیا۔ بھارتی میڈیا کے مطابق امدادی کارروائیوں میں بھارتی فوج نے بھی حصہ لیا تاکہ ملبے اور کچرے تلے دبے افراد کو جلد از جلد نکالا جا سکے۔
بھارت: شراب نوشی پر والد کی سرزنش جان لیوا ثابت ہوئی، بیٹے نے حملہ کر کے قتل کر دیا
ریسکیو اہلکار بھاری مشینری اور خصوصی آلات کی مدد سے متاثرہ مقام پر کام کر رہے ہیں، جبکہ علاقے کو حفاظتی حصار میں لے لیا گیا ہے۔
ہلاکتوں میں اضافے کا خدشہ
انتظامیہ کے مطابق اب تک 8 افراد کی ہلاکت کی تصدیق ہو چکی ہے، جبکہ ایک شخص تاحال لاپتا ہے اور اس کی تلاش جاری ہے۔ حکام نے خدشہ ظاہر کیا ہے کہ امدادی کارروائیاں مکمل ہونے تک ہلاکتوں کی تعداد میں اضافہ بھی ہو سکتا ہے۔
حادثے کے باعث انتظامی عمارت کو بھی شدید نقصان پہنچا ہے، جبکہ متعلقہ حکام نے واقعے کی وجوہات جاننے کے لیے تحقیقات شروع کر دی ہیں۔ ابتدائی طور پر یہ معلوم کیا جا رہا ہے کہ کچرے کا اتنا بڑا ڈھیر کس وجہ سے اچانک سرک کر عمارت پر آ گرا اور آیا حفاظتی انتظامات مقررہ معیار کے مطابق تھے یا نہیں۔
حکام کا کہنا ہے کہ تحقیقات مکمل ہونے کے بعد ذمہ دار عناصر کے تعین اور آئندہ ایسے واقعات کی روک تھام کے لیے ضروری اقدامات کیے جائیں گے۔
