Bahrain کی وزارتِ داخلہ نے دعویٰ کیا ہے کہ ایرانی پاسدارانِ انقلاب سے مبینہ تعلق رکھنے والے 41 افراد کو حراست میں لے لیا گیا ہے۔
بین الاقوامی میڈیا رپورٹس کے مطابق بحرینی حکام نے یہ کارروائی جاسوسی اور غیر ملکی مداخلت سے متعلق موصول ہونے والی خفیہ اطلاعات کی بنیاد پر کی۔ وزارتِ داخلہ کا کہنا ہے کہ گرفتار افراد سے تفتیش جاری ہے اور ان کے خلاف قانون کے مطابق کارروائی کی جا رہی ہے۔
بحرینی حکام کے مطابق تحقیقات کا دائرہ مزید وسیع کیا جا رہا ہے جبکہ ایسے دیگر مشتبہ افراد کی تلاش بھی جاری ہے جن کے ایرانی پاسدارانِ انقلاب سے روابط ہونے کا شبہ ہے۔
وزارتِ داخلہ نے کہا ہے کہ 28 فروری کے بعد خطے میں پیدا ہونے والی کشیدہ صورتحال، خصوصاً امریکا اور اسرائیل سے منسلک حملوں کے تناظر میں سکیورٹی نگرانی مزید سخت کی گئی تھی، جس کے نتیجے میں یہ گرفتاریاں عمل میں آئیں۔
اسرائیلی فوج کا پاسدارانِ انقلاب کی قدس فورس کے اہم عہدیدار کو شہید کرنے کا دعویٰ
دوسری جانب ایران کی جانب سے اس معاملے پر تاحال کوئی باضابطہ ردعمل سامنے نہیں آیا، تاہم ماہرین کے مطابق خلیجی خطے میں بڑھتی ہوئی کشیدگی کے باعث سکیورٹی خدشات میں مسلسل اضافہ دیکھا جا رہا ہے۔
