پاکستان اور آسٹریلیا کے درمیان ٹی ٹوئنٹی سیریز کے پہلے میچ میں پاکستان نے ٹاس جیت کر پہلے بیٹنگ کرنے کا فیصلہ کیا ہے۔ قومی ٹیم کے کپتان نے ٹاس کے بعد کہا کہ پچ پر اچھا اسکور کھڑا کرنا چاہتے ہیں تاکہ بعد میں دباؤ کے ساتھ دفاع کیا جا سکے۔
آسٹریلوی ٹیم کی قیادت اس میچ میں ٹریوس ہیڈ کر رہے ہیں۔ اس میچ کے ذریعے آسٹریلیا کی جانب سے تین کھلاڑی بین الاقوامی ٹی ٹوئنٹی کرکٹ میں ڈیبیو کر رہے ہیں جن میں ماہلی بیئرڈمین، جیک ایڈورڈز اور میتھیو رنشا شامل ہیں۔ آسٹریلوی کیمپ میں نوجوان کھلاڑیوں کو آزمانے کو مستقبل کی تیاری قرار دیا جا رہا ہے۔
آسٹریلیا کی پلیئنگ الیون میں ٹریوس ہیڈ کے ساتھ میتھیو شارٹ، کیمرون گرین، میتھیو رنشا، کوپر کونلی، مچل اوون، جوش فلپس، جیک ایڈورڈز، زیویر بریٹ لیٹ، ایڈم زمپا اور ماہلی بیئرڈمین شامل ہیں۔ ٹیم میں بیٹنگ اور بولنگ دونوں شعبوں میں توازن برقرار رکھنے کی کوشش کی گئی ہے۔
دوسری جانب پاکستان نے بھی متوازن اور تجربہ کار اسکواڈ میدان میں اتارا ہے۔ قومی ٹیم کی پلیئنگ الیون میں صائم ایوب اور صاحبزادہ فرحان اوپننگ کی ذمہ داریاں نبھائیں گے، جبکہ مڈل آرڈر میں سلمان علی آغا، بابر اعظم، فخر زمان اور عثمان خان شامل ہیں۔ آل راؤنڈرز میں شاداب خان اور محمد نواز ٹیم کا حصہ ہیں۔
آسٹریلوی کرکٹ ٹیم کی لاہور آمد، پاک آسٹریلیا ٹی 20 سیریز کا آغاز جمعرات سے ہوگا
بولنگ شعبے میں پاکستان کو شاہین شاہ آفریدی کی قیادت میں ایک مضبوط اٹیک میسر ہے، جن کا ساتھ سلمان مرزا اور ابرار احمد دیں گے۔ ٹیم مینجمنٹ کو امید ہے کہ بیٹنگ میں اچھا آغاز اور بولنگ میں نظم و ضبط کے ساتھ پاکستان سیریز کا فاتحانہ آغاز کر سکتا ہے۔
شائقین کرکٹ کو دونوں ٹیموں کے درمیان ایک سنسنی خیز مقابلے کی توقع ہے، جہاں تجربہ اور نوجوان ٹیلنٹ کا دلچسپ امتزاج دیکھنے کو ملے گا۔
