مستونگ ، شمس آباد کے علاقے میں پولیس کے ٹرک کو بم دھماکے کا نشانہ بنایا گیا، جس کے نتیجے میں تین پولیس اہلکار جان کی بازی ہار گئے، جبکہ 19 افراد زخمی ہو گئے۔
پولیس حکام کے مطابق دھماکہ اس وقت ہوا جب پولیس اہلکار معمول کے فرائض انجام دے رہے تھے، دھماکے کی شدت اتنی زیادہ تھی کہ قریبی عمارتوں کے شیشے بھی ٹوٹ گئے۔
ریسکیو ذرائع نے بتایا ہے کہ زخمیوں اور جاں بحق اہلکاروں کو فوری طور پر قریبی اسپتال منتقل کر دیا گیا ہے، جہاں زخمیوں کو طبی امداد دی جا رہی ہے۔
پولیس ذرائع کا کہنا ہے کہ واقعے کے بعد علاقے کو گھیرے میں لے لیا گیا ہے، مکمل ناکہ بندی اور بم ڈسپوزل اسکواڈ کو بلا کر جائے وقوعہ پر تفتیش کا آغاز کر دیا گیا ہے۔
یاد رہے کہ مستونگ پاکستان کے صوبہ بلوچستان میں واقع ہے، یہ کوئٹہ کے جنوب میں تقریباً 50 کلومیٹر کے فاصلے پر واقع ایک اہم ضلع ہے، جو اپنے اسٹریٹجک محلِ وقوع کے باعث اکثر خبروں میں رہتا ہے۔
یاد رہے کہ بلوچستان میں علیحدگی پسند تنظیم بی ایل اے متحرک ہے ، جو اکثر صوبے میں دہشتگردانہ کارروائیوں میں ملوث رہتی ہے ۔
