اسلام آباد، چیئرمین پی ٹی آئی بیرسٹر گوہر کا کہنا تھا کہ جعلی حکومت خود کو این آر او دینے کیلئے قانون سازی کررہی ہے۔
چیئرمین پی ٹی آئی بیرسٹر گوہر کی جانب سے جلسے سے خطاب کے دوران یہ کہنا تھا کہ آج عدلیہ میں قانون سازی کی کوشش کی جارہی ہے، پی ٹی آئی ججز کے حوالے سے قانون سازی کی مخالفت کرے گی۔
بیرسٹر گوہر کا کہنا تھا کہ عمران خان بہت جلد جیل سے باہر آئیں گے، آج سابق وزیراعظم عمران خان کا جذبہ بول رہا ہے، وہ لوگ جنہوں نے لوگوں سے زیادہ کنٹینرز رکھ دیے تھے، کہہ رہے تھے کہ ہم نے شہر اقتدار کو پنجرہ نہیں بنانا۔
بیرسٹر گوہر نے کہا کہ وفاقی دارلحکومت اسلام آباد کو پنجرہ بنا دیا گیا ہے پھر بھی یہاں بانی پی ٹی آئی عمران خان کا جنون بول رہا ہے۔
چیئرمین پی ٹی آئی نے کہا کہ جعلی اور فارم 47 کی حکومت رات کے اندھیرے میں قانون سازی کرتی ہے، لیکن ’این آراو‘ دینے کا وقت اب ختم ہوگیا ہے، سابق وزیراعظم عمران خان ایک حقیقت ہے کہ جسے اب تسلیم کرنا ہوگا۔
دوسری جانب ڈسٹرکٹ مجسٹریٹ کی جانب سے صدر پی ٹی آئی اسلام آباد عامر مسعود کو نوٹس جاری کردیا گیا ہے، پولیس اور ضلعی انتظامیہ کو خلاف ورزی کرنے والوں کے خلاف سخت کارروائی کی ہدایت بھی کر دی گئی ہے۔
آئی جی اسلام آباد کا کہنا تھا کہ جلسہ منتظمین کیخلاف قانونی کارروائی کی جائے گی، شہر اقتدار میں احتجاج کے متعلق قانون آ چکا ہے، پی ٹی آئی کے جلسے پر قانون اپنا راستہ لے گا۔
