وزیر اطلاعات عظمیٰ بخاری کا کہنا ہے کہ مریم نواز کی قیادت میں صحت کارڈ بدستور جاری ہے، جبکہ بلوچستان میں مظالم پر انسانی حقوق کی تنظیمیں خاموش کیوں ہیں؟
لاہور: وزیر اطلاعات پنجاب عظمیٰ بخاری نے پریس کانفرنس کرتے ہوئے کہا ہے کہ انسانی حقوق کے علمبردار بلوچستان میں ہونے والے مظالم پر آواز کیوں نہیں اٹھاتے؟ انہوں نے کہا کہ بلوچستان میں ظلم پر ہم سب آواز بلند کرتے ہیں، روزانہ کی بنیاد پر دہشت گردوں کے خلاف آپریشن جاری ہیں اور اس عفریت سے نمٹنے کے لیے سخت اقدامات ضروری ہیں۔
عظمیٰ بخاری کا کہنا تھا کہ پنجاب حکومت کا اولین ایجنڈا صحت ہے اور وزیراعلیٰ پنجاب مریم نواز اس شعبے کو بہتر بنانے کے لیے دن رات محنت کر رہی ہیں۔ انہوں نے واضح کیا کہ صحت کارڈ پر مریضوں کا علاج اب بھی جاری ہے اور اس کے بند ہونے سے متعلق تمام دعوے جھوٹ پر مبنی ہیں۔ ان کے مطابق صحت کارڈ کا استعمال نجی اسپتالوں میں جاری ہے، جبکہ سرکاری اسپتالوں میں اس کا غلط استعمال ہو رہا تھا، جس کی آڈٹ رپورٹ جلد منظرِ عام پر آئے گی۔
پی ٹی آئی کے احتجاجی منصوبوں پر بات کرتے ہوئے انہوں نے کہا کہ پنجاب نے نہ پہلے کسی ایسی کال پر ردعمل دیا اور نہ اب دے گا۔ انکشاف کیا کہ اطلاعات کے مطابق کے پی حکومت سے پی ٹی آئی کی تحریک کے لیے فنڈز نکلوائے جا رہے ہیں۔
نئی نمبر پلیٹ نہ لگانے پر چالان، سندھ ہائیکورٹ میں چیلنج
بارشوں کے نتیجے میں شہر کے مختلف علاقوں میں پانی جمع ہونے پر بات کرتے ہوئے صوبائی وزیر نے کہا کہ طوفانی بارش میں پانی کھڑا ہونا قدرتی امر ہے، لیکن سوشل میڈیا پر جو تصویریں وائرل ہوئیں، وہ دراصل ڈی ایچ اے لاہور کی تھیں۔ انہوں نے وضاحت کی کہ ڈی ایچ اے پنجاب حکومت کے دائرہ اختیار میں نہیں آتا، اور وہاں کے عوام جنہیں ووٹ دیتے ہیں، وہی ان سے جواب طلب کریں۔
یاد رہے کہ** ماضی میں بھی لاہور میں ہونے والی شدید بارشوں کے بعد سوشل میڈیا پر ڈی ایچ اے کی تصاویر کو حکومت پنجاب کے کھاتے میں ڈالنے کی کوشش کی گئی تھی، جس کی متعلقہ حکام کی جانب سے وضاحت کی جاتی رہی ہے۔
