راولپنڈی میں عوامی مسلم لیگ کے سربراہ شیخ رشید احمد نے امریکا کے حالیہ فیصلے پر طنز کرتے ہوئے کہا کہ ٹرمپ نے پیار کی پینگیں ہمارے ساتھ ڈالیں مگر 10 سالہ دفاعی معاہدہ بھارت سے کر لیا۔
انسداد دہشت گردی عدالت کے باہر میڈیا سے گفتگو کرتے ہوئے شیخ رشید نے کہا کہ جسٹس صداقت علی نے میرا نام ای سی ایل سے نکالا تھا جبکہ اے ٹی سی نے بھی بیرون ملک جانے پر کوئی اعتراض نہیں کیا۔ انہوں نے کہا کہ ہائیکورٹ کا فیصلہ چیلنج کریں گے کیونکہ عدالتی حکم کے باوجود میرا نام فہرست سے نہیں نکالا گیا۔
شیخ رشید کا کہنا تھا کہ ہمارا جینا مرنا پاکستان کے ساتھ ہے، مقدمات کی ہر پیشی پر عدالت میں پیش ہوتا ہوں جبکہ وقوعہ کے وقت میں ملک میں موجود بھی نہیں تھا۔
عدالتی حکم کے باوجود شیخ رشید کو عمرے پر جانے سے روک دیا گیا
انہوں نے مزید کہا کہ عالمی سطح پر ہونے والے فیصلے دوغلے معیار کو ظاہر کرتے ہیں، ٹرمپ انتظامیہ کی جانب سے بھارت کے ساتھ دفاعی معاہدہ پاکستان کے لیے تشویشناک ہے۔
یاد رہے کہ گزشتہ روز شیخ رشید کو اسلام آباد ایئرپورٹ پر امیگریشن حکام نے عمرے کی ادائیگی کے لیے بیرون ملک جانے سے روک دیا تھا حالانکہ لاہور ہائیکورٹ راولپنڈی بینچ نے انہیں سفر کی اجازت دے رکھی تھی۔
