چیئرمین پیپلز پارٹی بلاول بھٹو زرداری کا کہنا ہے کہ سندھ حکومت سیلاب متاثرین کے لیے گھروں کی تعمیر اور سولر سسٹمز فراہم کر رہی ہے، وعدے پورے کیے جا رہے ہیں۔
چیئرمین پیپلز پارٹی بلاول بھٹو زرداری نے کہا ہے کہ انہیں خوشی ہے کہ پیپلز پارٹی اپنے وعدے پورے کر رہی ہے۔ بلاول بھٹو کے مطابق شہید بینظیر بھٹو کا مشہور وعدہ تھا کہ پارٹی عوام کو روٹی، کپڑا اور مکان فراہم کرے گی، اور سندھ حکومت کی جانب سے متاثرہ خاندانوں کے لیے گھروں کی تعمیر کا کام جاری ہے۔
انہوں نے بتایا کہ پیپلز پارٹی صرف گھر ہی نہیں بلکہ ہر گھر میں سولر سسٹم بھی فراہم کرے گی تاکہ عوام کی مشکلات کم ہوں۔
بلاول بھٹو نے کہا کہ حکومت کی کوشش ہے کہ سیلاب متاثرین کے گھروں کی تعمیر جلد مکمل ہو جائے اور مالکانہ حقوق خواتین کے نام منتقل کیے جائیں۔
انہوں نے مزید کہا کہ 21 لاکھ متاثرہ خاندانوں کے لیے بڑے پیمانے پر گھروں کی تعمیر کے ساتھ ساتھ مفت شمسی توانائی کی سہولت فراہم کی جا رہی ہے اور مستقبل میں واش فیسلٹیز بھی ان گھروں میں شامل کی جائیں گی تاکہ عوام کی سہولیات بہتر ہوں اور مشکلات میں کمی آئے۔
