اسلام آباد: چیئرمین فیڈرل بورڈ آف ریونیو (ایف بی آر) راشد محمود لنگڑیال نے کہا ہے کہ وزیراعظم شہباز شریف کی ہدایت پر تنخواہ دار طبقے کے لیے ٹیکسوں میں ریلیف کی تیاری شروع کر دی گئی ہے۔
پاکستان بزنس کونسل کے سیمینار سے خطاب کرتے ہوئے راشد محمود لنگڑیال کا کہنا تھا کہ وزیراعظم نے بڑی کمپنیوں پر عائد سپر ٹیکس میں کمی کی بھی ہدایت کی ہے، جس پر عملدرآمد کے لیے حکومتی سطح پر مشاورت جاری ہے۔
چیئرمین ایف بی آر نے کہا کہ ملک میں ٹیکس دہندگان کی تعداد میں اضافہ ہی ٹیکس ریٹ میں کمی کا مؤثر ذریعہ بن سکتا ہے۔ ان کے مطابق جتنا زیادہ لوگ ٹیکس نیٹ میں آئیں گے، اتنا ہی کم بوجھ تنخواہ دار طبقے اور کاروباری طبقے پر پڑے گا۔
انہوں نے مزید کہا کہ وفاقی حکومت اگلے مرحلوں میں بڑی کمپنیوں اور کاروباری اداروں پر سپر ٹیکس بتدریج کم کرنے اور بالآخر اسے ختم کرنے کے لیے بھی تیار ہے۔
