پاکستان نے بھارتی طیاروں کیلئے فضائی حدود کی بندش میں ایک ماہ کی توسیع کر دی

پاک بھارت کشیدگی کے باعث بھارتی طیاروں کے لیے فضائی حدود کی بندش میں مزید ایک ماہ کی توسیع، نوٹم آج سہ پہر جاری ہوگا، بھارت نے بھی پاکستانی طیاروں پر اپنی فضائی حدود بند کر رکھی ہے

اسلام آباد، پاکستان نے بھارتی طیاروں کے لیے فضائی حدود کی بندش میں ایک ماہ کی مزید توسیع کا فیصلہ کیا ہے۔ ایوی ایشن ذرائع کے مطابق 24 اپریل کو پاک بھارت کشیدگی کے بعد پاکستان نے بھارتی طیاروں کے لیے اپنی فضائی حدود بند کر دی تھی، جس کی مدت 23 مئی کو ایک بار توسیع کے بعد آج ختم ہو رہی ہے۔

تازہ فیصلے کے تحت اب پاکستانی فضائی حدود بھارتی طیاروں کے لیے آج سے مزید ایک ماہ تک بند رہے گی۔ ذرائع کے مطابق اس سلسلے میں باقاعدہ نوٹم (نوٹس ٹو ایئرمین) آج سہ پہر تک جاری کر دیا جائے گا۔

یاد رہے کہ بھارت نے بھی پاکستان کی جانب سے فضائی حدود بند کیے جانے کے بعد جوابی طور پر پاکستانی طیاروں پر اپنی فضائی حدود بند کر دی تھی، اور دونوں ملکوں کے درمیان فضائی رابطوں کی معطلی اب تک برقرار ہے۔ اس کشیدگی کے باعث بین الاقوامی پروازوں کو متبادل راستے اختیار کرنے پڑ رہے ہیں، جس سے سفری لاگت میں اضافہ اور تاخیر کا سامنا بھی جاری ہے۔