وفاقی وزیر داخلہ محسن نقوی نے کہا ہے کہ ون کانسٹیٹیوشن ایونیو کے معاملے پر حکومتی مؤقف میں کوئی تبدیلی نہیں آئی۔ انہوں نے واضح کیا کہ اس کیس میں قانون کے مطابق کارروائی کی جائے گی اور کسی کے ساتھ امتیازی سلوک نہیں ہوگا۔
لاہور میں صحافیوں سے غیر رسمی گفتگو کرتے ہوئے انہوں نے بتایا کہ کیپیٹل ڈیولپمنٹ اتھارٹی (سی ڈی اے) کے مطابق ون کانسٹیٹیوشن ایونیو منصوبہ غیر قانونی تھا۔ ان کا کہنا تھا کہ اس منصوبے کی فروخت کے طریقہ کار پر بھی سوالات اٹھے ہیں، جس کی تحقیقات کے لیے کمیٹی قائم کر دی گئی ہے۔
محسن نقوی نے کہا کہ حکومت اس معاملے میں بھی یہی مؤقف کمیٹی کے سامنے پیش کرے گی اور امید ہے کہ فیصلہ قانون کے مطابق ہوگا۔ انہوں نے زور دیا کہ قانون کی نظر میں سب برابر ہیں، چاہے وہ امیر ہوں یا غریب۔
عمران خان کی صحت پر پی ٹی آئی پروپیگنڈا کر رہی ہے: محسن نقوی
انہوں نے مزید کہا کہ یہ معاملہ پاکستان کی تاریخ کے بڑے مالی اسکینڈلز میں شامل ہو سکتا ہے، جس میں مختلف شعبوں سے تعلق رکھنے والے افراد کے ملوث ہونے کے الزامات ہیں۔ ان کا کہنا تھا کہ جن لوگوں نے ملک کو نقصان پہنچایا، ان کے خلاف کارروائی ہونی چاہیے اور وہ اس سلسلے میں سی ڈی اے کے مؤقف کی مکمل حمایت کرتے ہیں۔
