چیئرمین این ڈی ایم اے لیفٹیننٹ جنرل انعام حیدر نے کہا کہ ماحولیاتی تبدیلی کے باعث پاکستان شدید متاثر ہوا ہے، رواں سال مون سون کی شدت 50 فیصد زیادہ ہے، تازہ اعدادوشمار کے مطابق 645 افراد جاں بحق ہو چکے۔
اسلام آباد،چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر نے کہا ہے کہ رواں سال مون سون کی شدت معمول سے 50 فیصد زیادہ ہے اور ستمبر تک بارشوں کے مزید تین اسپیل متوقع ہیں۔
اسلام آباد میں پریس بریفنگ کے دوران انعام حیدر نے بتایا کہ ماحولیاتی تبدیلی نے پاکستان کو شدید متاثر کیا ہے، بونیر، باجوڑ، بٹگرام اور بابوسر گلگت بلتستان میں سب سے زیادہ تباہی دیکھی گئی، جب کہ آج اسلام آباد میں کلاؤڈ برسٹ بھی نوٹ کیا گیا۔
انہوں نے کہا کہ سیلاب زدہ علاقوں کا مکمل سروے کیا جا رہا ہے، متاثرہ لوگوں کو خوراک اور امدادی سامان فراہم کیا جائے گا، کٹ جانے والی آبادیوں سے رابطے بحال کرنے کی کوششیں جاری ہیں، مسلح افواج عوام کے ساتھ ہیں اور وزیراعظم کی ہدایت پر ریلیف پیکج پہنچایا جا رہا ہے۔
این ڈی ایم اے کی وارننگ: اگلے 48 گھنٹوں میں پانی کے ذخائر خطرناک سطح تک بھڑنے کا خدشہ
چیئرمین این ڈی ایم اے نے مزید کہا کہ شمالی پنجاب اور شمالی خیبرپختونخوا میں مون سون مزید شدت دکھا سکتا ہے، متعلقہ وزارتوں کے ساتھ مل کر متاثرین کی بحالی کی جائے گی۔
نقصانات کے تازہ اعداد و شمار
این ڈی ایم اے کی رپورٹ کے مطابق گزشتہ 24 گھنٹوں کے دوران 151 افراد جاں بحق ہوئے جن میں سے 144 اموات خیبرپختونخوا میں ہوئیں۔ جاں بحق ہونے والوں میں 124 مرد، 16 خواتین اور 11 بچے شامل ہیں۔
رواں سال مون سون بارشوں کے باعث ملک بھر میں جاں بحق افراد کی تعداد 645 ہو گئی ہے۔
