لاہور ہائیکورٹ راولپنڈی بینچ نے ٹک ٹاک کے لائیو فیچر اور فیملی ولاگنگ کے خلاف دائر درخواست پر متعلقہ اداروں سے رپورٹ طلب کر لی ہے۔
یہ درخواست شہری حنا فاطمہ نے اپنے وکیل چوہدری رضوان الٰہی کے ذریعے دائر کی، جس میں مؤقف اپنایا گیا کہ ٹک ٹاک کا لائیو فیچر اور گفٹنگ سسٹم فوری طور پر بند کیا جائے یا اس پر سخت ریگولیشنز نافذ کی جائیں۔
درخواست میں کہا گیا کہ ٹک ٹاک پر فیملی ولاگنگ اسلامی و آئینی اقدار کی خلاف ورزی ہے، اور یہ پلیٹ فارم نوجوان نسل، خصوصاً کمسن لڑکیوں کے اخلاق و مستقبل کے لیے نقصان دہ بنتا جا رہا ہے۔ سوشل میڈیا مجموعی طور پر اسلامی، معاشرتی اور قومی سلامتی کے لیے بھی خطرہ بن چکا ہے۔
درخواست گزار کے مطابق ٹک ٹاک پر فحاشی، اخلاقی بگاڑ اور معاشرتی انتشار کو فروغ دیا جا رہا ہے، جس پر فوری اقدامات ضروری ہیں۔
عدالت نے اس درخواست پر ایف آئی اے، پی ٹی اے اور وزارتِ داخلہ سے فوری جواب طلب کر لیا ہے، جبکہ پاکستانی صارفین کا ڈیٹا غیر ملکی کمپنیوں کے پاس منتقل ہونے پر بھی عدالت نے تشویش کا اظہار کیا۔
عدالت نے درخواست سماعت کے لیے منظور کرتے ہوئے کیس کی باقاعدہ سماعت 15 اکتوبر کو مقرر کر دی۔
یہ حکم جسٹس ملک محمد اویس خالد نے جاری کیا۔
