محکمہ انسداد دہشت گردی (سی ٹی ڈی) اور وفاقی حساس اداروں کی مشترکہ کارروائی میں دہشت گردی کا ایک بڑا منصوبہ ناکام بنا دیا گیا۔
حکام نے شہر کے مختلف علاقوں میں کارروائی کرتے ہوئے کالعدم تنظیموں سے تعلق رکھنے والے 5 دہشت گردوں کو گرفتار کر لیا۔
سی ٹی ڈی کے مطابق کارروائیاں کراچی کے علاقوں منگھوپیر اور کشمیر روڈ پر کی گئیں۔ گرفتار دہشت گردوں میں دو کا تعلق تحریک طالبان پاکستان (ٹی ٹی پی) سے ہے جن کی شناخت اللہ نور اور سرفراز کے نام سے ہوئی ہے، جبکہ تین دہشت گرد سلیم، جہانزیب اور امداد اللہ القاعدہ برصغیر کے نیٹ ورک سے وابستہ پائے گئے۔
ترجمان سی ٹی ڈی نے بتایا کہ یہ تمام دہشت گرد تنظیم فتنہ الخوارج اور القاعدہ برصغیر کے لیے کام کر رہے تھے، اور کراچی میں تخریبی کارروائیوں کی منصوبہ بندی کر رہے تھے۔ ان افراد نے پڑوسی ملک میں عسکری تربیت بھی حاصل کر رکھی تھی۔
حکام کا کہنا ہے کہ گرفتار ملزمان کے قبضے سے بھاری مقدار میں غیر قانونی اسلحہ برآمد ہوا ہے، جس میں جدید خودکار ہتھیار بھی شامل ہیں۔ ابتدائی تحقیقات سے معلوم ہوا ہے کہ دہشت گردوں کا نیٹ ورک شہر میں فعال تھا اور وہ حساس مقامات کو نشانہ بنانے کی تیاری کر رہے تھے۔
سی ٹی ڈی کی کارروائی، کالعدم تنظیم کے 3 دہشتگرد ہلاک
سی ٹی ڈی نے گرفتار ملزمان کے خلاف غیر قانونی اسلحہ رکھنے اور دہشت گردی کے الزامات کے تحت مقدمات درج کر لیے ہیں۔ مزید تفتیش جاری ہے تاکہ سہولت کاروں اور دیگر نیٹ ورک ارکان کو بھی قانون کے کٹہرے میں لایا جا سکے۔
