پشاور میں تقریب سے خطاب کرتے ہوئے گورنر خیبرپختونخوا فیصل کریم کنڈی نے وزیراعلیٰ علی امین گنڈاپور کو سخت تنقید کا نشانہ بنایا۔
پشاور میں منعقدہ ایک تقریب سے خطاب کرتے ہوئے گورنر خیبرپختونخوا فیصل کریم کنڈی نے وزیراعلیٰ علی امین گنڈاپور پر ایک بار پھر شدید تنقید کی، اور انہیں صوبے میں بدانتظامی اور غیرسنجیدگی کا ذمہ دار قرار دیا۔ گورنر نے کہا کہ وزیراعلیٰ کی جانب سے صوبے کے اہم معاملات میں غیرذمہ دارانہ رویہ اختیار کیا جا رہا ہے، جو خیبرپختونخوا کے عوام کے لیے باعثِ تشویش ہے۔
فیصل کریم کنڈی کا کہنا تھا کہ ’’وزیراعلیٰ نے ہماری ناک کٹوادی ہے، حسبِ روایت وہ کارکنوں کو چھوڑ کر راہِ فرار اختیار کر گئے‘‘۔ ان کے مطابق، عوامی جلسے اور ایونٹس میں علی امین گنڈاپور کی غیرحاضری اس بات کا ثبوت ہے کہ وہ خود اپنی پالیسیوں پر اعتماد نہیں رکھتے۔ گورنر نے دعویٰ کیا کہ انہوں نے پہلے ہی پیش گوئی کی تھی کہ وزیراعلیٰ جلسہ نہیں کریں گے۔
گورنر نے مزید کہا کہ ’’حکومتیں آل پارٹیز کانفرنس (اے پی سی) نہیں کرتیں بلکہ وہ باقاعدہ پالیسی اسٹیٹمنٹ دیتی ہیں‘‘۔ انہوں نے سوال اٹھایا کہ علی امین گنڈاپور کے بیانات میں تسلسل کیوں نہیں، اور آیا وہ خود اپنی پوزیشن کے حوالے سے واضح ہیں یا نہیں۔
فیصل کریم کنڈی نے دہشتگردی سے متعلق بھی سخت ریمارکس دیتے ہوئے کہا کہ ’’دہشتگردوں کو لانے والے یہی لوگ ہیں‘‘۔ انہوں نے واضح کیا کہ کسی صوبے کو یہ اختیار نہیں کہ وہ کسی دوسرے ملک یا ریاست سے خود بات چیت کرے، یہ صرف وفاق کا اختیار اور ذمہ داری ہے۔
فیصل کریم کنڈی اور علی امین گنڈاپور کے درمیان سیاسی کشیدگی نئی نہیں، دونوں رہنما ایک دوسرے کے خلاف ماضی میں بھی سخت بیانات دے چکے ہیں، اور حالیہ تنقید اسی سیاسی تنازعے کی ایک تازہ کڑی ہے۔
