فیلڈ مارشل سید عاصم منیر نے کہا ہے کہ قومی سلامتی کو لاحق کسی بھی خطرے کے حوالے سے زیرو ٹالرنس کی پالیسی اپنائی گئی ہے اور پاک فوج ہر قسم کے اندرونی و بیرونی چیلنجز سے نمٹنے کے لیے مکمل طور پر تیار اور پُرعزم ہے۔ ان کا کہنا تھا کہ بدلتے ہوئے عالمی اور علاقائی حالات کے پیش نظر مستقبل کی جنگوں کے تقاضے مختلف ہیں، جن سے ہم آہنگ ہونے کے لیے جدید حکمتِ عملی، جدید ٹیکنالوجی اور مسلسل تربیت ناگزیر ہے۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے لاہور گیریژن کا دورہ کیا، جہاں انہیں فارمیشن کی آپریشنل تیاریوں، سیکیورٹی انتظامات اور مجموعی پیشہ ورانہ صلاحیتوں پر تفصیلی بریفنگ دی گئی۔ دورے کے دوران انہوں نے فارمیشن کے زیرِ اہتمام مختلف تربیتی مشقوں کا بھی مشاہدہ کیا اور جوانوں کی پیشہ ورانہ مہارت، نظم و ضبط اور جذبے کو سراہا۔
فیلڈ مارشل نے اس موقع پر کہا کہ مستقبل کی جنگیں روایتی انداز سے مختلف ہوں گی، اس لیے پاک فوج کو جدید ٹیکنالوجی، اختراعی سوچ اور ہمہ وقت تیاری کے اصولوں پر عمل پیرا رہنا ہوگا۔ انہوں نے جدت اپنانے، جدید آلات کے مؤثر استعمال اور جنگی حکمتِ عملی میں مسلسل بہتری پر زور دیا تاکہ کسی بھی ممکنہ خطرے کا بروقت اور مؤثر جواب دیا جا سکے۔
آرمی چیف نے جوانوں کو فراہم کی جانے والی کھیلوں اور تفریحی سہولتوں کو بھی سراہا اور کہا کہ فوجی جوانوں کی جسمانی فٹنس، ذہنی سکون اور بلند حوصلہ جنگی تیاریوں کا لازمی جزو ہیں۔ ان کے مطابق ایک مضبوط اور متحرک فوج کے لیے جوانوں کی فلاح و بہبود پر توجہ دینا انتہائی ضروری ہے۔
فیلڈ مارشل کی ملکی ترقی اور خارجہ پالیسی میں کوششوں پر کوئی ابہام نہیں: وزیر دفاع
آئی ایس پی آر کے مطابق فیلڈ مارشل سید عاصم منیر نے سی ایم ایچ لاہور میں قائم ہائی کیئر سینٹر کا بھی دورہ کیا، جہاں انہوں نے مریضوں کی عیادت کی اور طبی عملے و انتظامیہ کی پیشہ ورانہ خدمات کو سراہا۔ انہوں نے کہا کہ فوجی اور طبی عملہ ہر مشکل وقت میں اپنی ذمہ داریاں احسن طریقے سے نبھا رہا ہے، جو قابلِ تحسین ہے۔
اس کے علاوہ چیف آف ڈیفنس فورسز نے لاہور گیریژن میں افسران سے خطاب کرتے ہوئے کہا کہ پاکستان کی خود مختاری اور علاقائی سالمیت کا تحفظ پاک فوج کا اولین اور مقدس مشن ہے۔ انہوں نے واضح کیا کہ مسلح افواج ملک کے دفاع، داخلی استحکام اور قومی مفادات کے تحفظ کے لیے ہر سطح پر تیار ہیں۔
فیلڈ مارشل سید عاصم منیر نے اپنے خطاب میں اس عزم کا اعادہ کیا کہ پاکستان کی مسلح افواج اعلیٰ پیشہ ورانہ معیار، سخت نظم و ضبط اور بے لوث قومی خدمت کے اصولوں پر کاربند ہیں۔ ان کا کہنا تھا کہ پاک فوج جدید دور کے تقاضوں سے ہم آہنگ ہونے کی بھرپور صلاحیت رکھتی ہے اور جوانوں کا مورال اور فٹنس ہمیشہ ہماری اولین ترجیح رہے گی۔
انہوں نے مزید کہا کہ بدلتی ہوئی جنگی نوعیت اور سیکیورٹی چیلنجز کے پیش نظر پاک فوج اپنی صلاحیتوں میں مسلسل اضافہ کر رہی ہے تاکہ وطنِ عزیز کے دفاع میں کسی قسم کی کمی نہ رہ جائے۔
