90
سندھ کے شہر میرپورخاص میں بینظیر انکم سپورٹ پروگرام (BISP) سے فائدہ اٹھانے والے سرکاری ملازمین کی بیگمات کی فہرست منظرِ عام پر آ گئی ہے، جنہوں نے مستحقین کے لیے مختص امدادی رقم وصول کی۔
سرکاری دستاویزات کے مطابق، محکمہ تعلیم کے گریڈ 1 سے 18 تک کے کم از کم 72 ملازمین کی بیویوں نے بی آئی ایس پی سے مالی امداد حاصل کی۔
ذرائع کے مطابق ان افراد نے فی کس دو ہزار روپے سے لے کر ایک لاکھ 90 ہزار روپے تک کی رقم مختلف مراحل میں وصول کی۔
اس انکشاف کے بعد ڈسٹرکٹ ایجوکیشن آفیسر نے اعلان کیا ہے کہ ان ملازمین کی تنخواہوں سے کٹوتی کر کے پوری رقم جلد بی آئی ایس پی کو واپس جمع کرا دی جائے گی۔
یاد رہے کہ بی آئی ایس پی کا مقصد غریب اور نادار خاندانوں کو مالی امداد فراہم کرنا ہے، اور سرکاری ملازمین کا بلا جواز فائدہ اٹھانا قانون و انصاف کے بنیادی اصولوں کی خلاف ورزی تصور کیا جا رہا ہے۔
