بانی سے جیل میں ملاقات سے انکار کی خبر پر بیرسٹر گوہر کی وضاحت

پاکستان تحریکِ انصاف کے چیئرمین بیرسٹر گوہر نے اس خبر کی سختی سے تردید کی کہ انہوں نے بانی پی ٹی آئی عمران خان سے ملاقات سے انکار کیا۔

ایک بیان میں بیرسٹر گوہر نے کہا کہ سوشل میڈیا پر گردش کرنے والی خبر قطعی غلط ہے۔ انہوں نے وضاحت دی کہ نہ انہیں ملاقات کی پیشکش کی گئی اور نہ ہی کسی فیملی ممبر یا وکیل کے ساتھ جانے کا سوال پیدا ہوا۔

بیرسٹر گوہر نے بتایا کہ وہ ہر منگل کو اڈیالہ جیل جاتے ہیں اور وہاں موجود رہتے ہیں جب تک پولیس انہیں آگے جانے سے نہیں روکتی، اور گزشتہ روز بھی یہی معمول اختیار کیا گیا۔

انہوں نے خبردار کیا کہ بانی سے متعلق خبریں، خصوصاً ملاقاتوں کے حوالے سے اطلاعات، انتہائی سنجیدہ نوعیت کی ہوتی ہیں اور ان کو نام نہاد ذرائع کی بنیاد پر زیرِ بحث لانا غیر ذمے دارانہ عمل ہے۔