اسلام آباد، وفاقی وزیر اطلاعات عطا اللہ تارڑ نے کہا ہے کہ پاکستان نے دنیا کو واضح پیغام دیا ہے کہ پاکستانی قوم اپنی آزادی اور دفاع کا بھرپور تحفظ کرنا جانتی ہے۔
پی ٹی وی ہیڈکوارٹرز میں پرچم کشائی کی تقریب سے خطاب کرتے ہوئے عطا اللہ تارڑ نے کہا کہ اس سال یوم آزادی کا جشن منفرد نوعیت کا ہے، کیونکہ مئی میں "معرکہ حق” نے دو قومی نظریے پر مہر ثبت کر دی۔ دو قومی نظریہ ایک زندہ حقیقت کے طور پر دنیا کے سامنے آیا۔
انہوں نے کہا کہ دشمن نے پہلگام فالس فلیگ واقعے کی آڑ میں پاکستان پر جارحیت مسلط کرنے اور ملک کا تشخص مجروح کرنے کی کوشش کی، لیکن پاکستانی قوم اور مسلح افواج نے دشمن کے عزائم کو ناکام بنا دیا۔
وفاقی وزیر کا کہنا تھا کہ اس بار جشن آزادی کے ساتھ ساتھ "معرکہ حق” کی تاریخی فتح کا جشن بھی منایا جا رہا ہے۔ افواج پاکستان نے جنگ میں بہترین حکمت عملی اپنا کر اپنی صلاحیتوں کا لوہا منوایا، جبکہ انفارمیشن وار فیئر میں بھی وزارت اطلاعات نے شاندار کردار ادا کیا۔
انہوں نے کہا کہ ڈیجیٹل وار فیئر کے ذریعے قوم کا حوصلہ بلند رکھنا اور عالمی سطح پر پاکستان کا بیانیہ اجاگر کرنا ہماری کامیابی ہے۔ 1965 کی جنگ میں پی ٹی وی سے ملی نغمے نشر کیے گئے اور آج بھی اسی جذبے کے ساتھ پاکستان کے دفاع کا عزم دہرایا جا رہا ہے۔
