راولپنڈی، آرمی چیف جنرل سید عاصم منیر کا کہنا ہے کہ قوم کی قربانیوں سے حاصل کیا گیا امن ہر صورت برقرار رکھا جائے گا۔
پاک فوج کے مطابق آرمی چیف جنرل سید عاصم منیر نے اورکزئی کا دورہ کیا جہاں کور کمانڈر پشاور کی جانب سے ان کا استقبال کیا گیا، آرمی چیف نے یادگار شہدا پر پھولوں کی چادر چڑھائی اور دہشتگردوں کے گٹھ جوڑ کو شکست فاش کرنے اور غیر قانونی سرگرمیوں کو ختم کرنے کے عزم کا اعادہ کیا۔
آئی ایس پی آر کا کہنا تھا کہ اس موقع پر آرمی چیف کو سکیورٹی کی مجموعی صورتحال اور انسداد دہشتگردی کی کارروائیوں کے حوالے سے بریفنگ دی گئی، آرمی چیف کو ضم شدہ اضلاع میں استحکام کو یقینی بنانے کیلئے کیے جانے والےاقدمات کے متعلق بھی آگاہ کیا گیا۔
پاک فوج کے مطابق جنرل سید عاصم منیر نے وادی تیراہ اور گردونواح میں انسداد دہشتگردی کی کارروائیوں میں حصہ لینے والےپاک فوج کے جوانوں سے ملاقات کی اور جوانوں کے بلند حوصلے اور ہر قسم کے خطرے کے خلاف مؤثر جواب دینے کی تیاری کو سراہا۔
اس موقع پرچیف آف آرمی سٹاف جنرل سید عاصم منیر نےسکیورٹی فورسز کیلئے مقامی آبادی کی حمایت کی تعریف کرتےہوئے یہ کہا کہ علاقے میں امن کو برقرار رکھنے میں مقامی آبادی کا مثبت کردار ضروری ہے۔
