لاہور ہائیکورٹ کی جانب سے چیئرمین نادرا لیفٹیننٹ جنرل منیر افسر کو عہدے پر بحال کر دیا گیا ہے۔
لاہور ہائیکورٹ میں چیئرمین نادرا کے عہدے کی بحالی سے متعلق کیس کی سماعت کی گئی، عدالت کی جانب سے چیئرمین نا درا کی تقرری کو کالعدم قرار دینے کا فیصلہ معطل کر دیا گیا ہے۔
جسٹس چوہدری محمد اقبال کی جانب سے یہ سوال کیا کہ درخواست میں کون سا نوٹیفکیشن چیلنج ہوا تھا؟ سرکاری وکیل نے جواب دیا کہ درخواست میں نگراں حکومت کا چیئرمین نادرا کی تقرری کا نوٹیفکیشن چیلنج ہوا تھا۔
وکیل کا کہنا تھا کہ درخواست گزار کی درخواست صرف نگراں حکومت کے نوٹی فکیشن کی حد تک محدود رہی، درخواست گزار نے کبھی بھی نئے رول کو چیلنج نہیں کیا۔
لاہور ہائیکورٹ کے 2 رکنی بینچ نے چیئرمین نادرا کی تقرری کو کالعدم قرار دینے کا سنگل بینچ کا فیصلہ معطل کرتے ہوئے لیفٹیننٹ جنرل محمد منیر افسر کو ان کے عہدے پر بحال کردیا ہے۔
یاد رہے کہ لاہور ہائی کورٹ کے جج جسٹس عاصم حفیظ پر مشتمل 1 رکنی بینچ کی جانب سے چیئرمین نادرا کی تعیناتی کو کالعدم قرار دیا گیا تھا۔
