پشاور، مشیر اطلاعات خیبر پختونخوا بیرسٹر ڈاکٹر سیف کا کہنا ہے کہ شہباز شریف کو سابق وزیراعظم عمران خان کی شکل میں اپنی سیاسی موت نظر آ رہی ہے۔
اپنے بیان میں بیرسٹر سیف نے کہا کہ ایک بھائی مفاہمت جبکہ دوسرا بھائی 9 مئی کا راگ الاپ رہا ہے، نواز شریف کی مفاہمت کی بات کر کے چوتھی بار وزیراعظم بننے کیلئے کوششیں جاری ہیں، دوسری طرف وزیراعظم پاکستان اپنے حامی وزراء کے ذریعے 9 مئی پر معافی کے بیانات دلوا رہے ہیں۔
بیرسٹر سیف نے کہا کہ نواز شریف کو مفاہمت میں جبکہ شہباز شریف کو سیاسی تناؤ میں خیر نظر آ رہی ہے، شہباز شریف کسی صورت نواز شریف کو وزیراعظم نہیں بننے دے رہے، نواز شریف کے مفاہمت کے بیانیے کو شہباز شریف دبا رہے ہیں۔
مشیر اطلاعات پختونخوا کا یہ کہنا تھا کہ نواز شریف کی طرف سے سابق وزیراعظم عمران خان سے مذاکرات کی کوشش ہو رہی ہے، نواز اور شہباز کی دوریاں کافی بڑھ چکی ہیں، نواز شریف اور شہباز شریف کے درمیان ملاقات میں شہباز شریف کے چہرے پر کوفت کے تاثرات واضح تھے۔
بیرسٹر سیف کا کہنا تھا کہ شہباز شریف کو عمران خان کی شکل میں اپنی سیاسی موت نظر آ رہی ہے، دونوں بھائی ذاتی اور سیاسی مفاد کی خاطر لڑ رہے ہیں، آصف زرداری ان دونوں بھائیوں کی لڑائی میں ڈگڈگی بجانے والے کا کردار ادا کررہے ہیں۔
