ایف آئی اے نے سمندر کے راستے غیر قانونی طور پر ایران جانے کی کوشش کرنے والے 24 افراد کو گرفتار کر لیا ہے۔ کارروائی جیوانی کے علاقے میں کی گئی، جہاں ملزمان کو ایران جانے کے لیے سمندری راستہ استعمال کرتے ہوئے پکڑا گیا۔
ایف آئی اے کے ترجمان کے مطابق گرفتار ملزمان پنجاب کے مختلف اضلاع سے تعلق رکھتے ہیں اور ایران پہنچنے کے بعد وہ دیگر ممالک میں غیر قانونی سفر کرنے کا ارادہ رکھتے تھے۔ گرفتار افراد کے خلاف مقدمہ درج کر کے تحقیقات کا آغاز کر دیا گیا ہے۔
دوسری جانب سیالکوٹ ایئرپورٹ پر بھی وزٹ ویزے کے ذریعے یورپ جانے کی غیر قانونی کوشش ناکام بنائی گئی۔ مشتبہ مسافروں محمد نفیس اور نبیل ادریس کا تعلق گوجرانوالہ سے ہے۔ ایف آئی اے کے مطابق امیگریشن کلیئرنس کے دوران مسافروں کے رویے مشکوک پائے گئے، جنہوں نے اعتراف کیا کہ وہ ایجنٹ محمد قاسم کے ذریعے غیر قانونی طور پر یورپ جانا چاہتے تھے اور اس کے لیے 40 لاکھ روپے کی رقم طے کی گئی تھی۔
ایف آئی اے نے عوام کو خبردار کیا ہے کہ غیر قانونی ذرائع سے بیرون ملک جانے کی کوششوں میں ملوث ہونے والے افراد قانون کی گرفت سے باہر نہیں رہ سکتے اور ایسے واقعات کے خلاف سخت اقدامات جاری رہیں گے۔
