لاہور، صوبائی وزیر اطلاعات اور رہنما مسلم لیگ ن عظمیٰ بخاری کا کہنا ہے کہ بیرسٹر سیف کا بھارتی وزیر خارجہ جے شنکر کو ریاست مخالف احتجاج میں شرکت کی دعوت دینا ملک سے دشمنی کا آخری لیول ہوتا ہے۔
مشیر اطلاعات خیبرپختونخوا بیرسٹر سیف کے بیان پر ردعمل دیتے ہوئے صوبائی وزیر عظمیٰ بخاری نے کہا کہ دیکھتے ہیں اسرائیلی مددگاروں کو احتجاج کی اجازت کب ملتی ہے؟ ان لوگوں میں ملکی وقار اور خود مختاری جیسی سوچ دور دور تک موجود نہیں، پی ٹی آئی کے ڈی این اے میں پاکستان مخالف جراثیم دوڑتے ہیں۔
عظمیٰ بخاری کا کہنا تھا کہ یہ اپنے عزائم سے ثابت کرتے ہیں ان کا مشن ملکی جڑوں کو کھوکھلا کرنا ہے، فتنہ پارٹی کے ریاست مخالف احتجاج میں افغان شہریوں کی شرکت کئی سوالات کھڑے کر رہی ہے، وفاقی دارالحکومت سے بڑی تعداد میں فتنہ پارٹی کے احتجاج میں شریک افغان شہریوں کی گرفتاری ان کے ناپاک عزائم کو بے نقاب کرتی ہے۔
رہنما مسلم لیگ ن کا کہنا تھا کہ اڈیالہ جیل کے قیدی نے قسم کھائی ہے کہ پاکستان میں امن اور خوشحالی قائم نہیں رہنے دینی، پنجاب کے عوام باشعور ہیں، اسی لیے پنجاب کے لوگوں نے اڈیالہ جیل کے قیدی کے بیانیہ کو مسترد کر دیا۔
عظمیٰ بخاری کا کہنا تھا کہ خیبر پختونخوا کے عوام کے حالات قابل رحم ہیں، ہم دعا کرتے ہیں کہ وہ جلد اس فتنے کی حقیقت دیکھیں۔
