لاہور ہائیکورٹ نے چیئرمین نادرا کو عہدے سے ہٹانے کا حکم دے دیا۔
لاہور ہائیکورٹ کی جانب سے چیئرمین نادرا لیفٹیننٹ جنرل محمد منیر افسر کو عہدے سے ہٹانے کا حکم دے دیا گیا ہے۔
لاہور ہائیکورٹ کی جانب سے چیئرمین نادرا کی تقرری کے خلاف درخواست کو منظور کرلیا گیا ہے، لاہور ہائیکورٹ میں شہری اشبا کامران نے چیئرمین نادرا کی تقرری کو چیلنج کررکھا تھا۔
جسٹس عاصم حفیظ کی جانب سے چیئرمین نادرا کی تقرری کے خلاف درخواست پر فیصلہ سنایا گیا ہے۔
درخواست گزار کی جانب سے یہ مؤقف اختیار کیا گیا تھا کہ نگراں حکومت نے نادرا قانون میں ترامیم کرکے حاضر سروس آرمی افسر کو تقرر کرنے کی منظوری دی تھی، نگران حکومت مستقل پالیسی معاملات میں مداخلت نہیں کر سکتی۔
درخواست گزار کا کہنا ہے کہ عدالت سے یہ استدعا کی گئی ہے کہ عدالت نادرا ترمیمی رولز کو کالعدم قرار دے اور حاضر سروس فوجی افسر کو بطور چیرمین نادرا تقرری کالعدم قرار دے۔
یاد رہے کہ نگران وفاقی حکومت کی جانب سے اکتوبر 2023 میں اُس وقت جنرل ہیڈ کوارٹز (جی ایچ کیو) میں تعینات آئی جی کمیونیکیشن اینڈ آئی ٹی لیفٹیننٹ جنرل محمد منیر افسر کو نیشنل ڈیٹا بیس اینڈ رجسٹریشن اتھارٹی (نادرا) کا چیئرمین مقرر کیا گیا تھا۔
