نیویارک، وزیر اعظم شہباز شریف کا کہنا ہے کہ طاقت کے غیر قانونی استعمال کو کسی صورت برداشت نہ کیا جائے، اسرائیل پر ہتھیاروں کی فراہمی سمیت دیگر پابندیاں لگائی جائیں۔
وزیر اعظم شہباز شریف کی جانب سے لیڈر شپ فارپیس کانفرنس سے خطاب کے دوران یہ کہا گیا ہے کہ مشرق وسطیٰ، یورپ اور دیگر خطوں میں جنگوں سے بین الاقوامی نظام کو خطرہ ہے، اسرائیل کو مشرق وسطیٰ میں جنگ پھیلانے سے روکا جائے۔
بیروت میں اسرائیلی بمباری کی مذمت کرتے ہوئے وزیراعظم پاکستان کی جانب سے یہ مطالبہ کیا گیا کہ اسرائیل پر ہتھیاروں کی فراہمی سمیت دیگر پابندیاں لگائی جائیں، اسرائیل کو اس کے جرم پر جواب دہ بنانا پڑے گا۔
وزیراعظم پاکستان کا کہنا تھا کہ طاقت کے غیر قانونی استعمال کو کسی صورت برداشت نہ کیا جائے، تنازعات کو حل نہ کرنے سے ہمارا مستقبل تاریک ہو سکتا ہے۔
مسئلہ کشمیر پر بات کے دوران شہباز شریف کا کہنا تھا کہ جموں و کشمیر کا مسئلہ حل نہ ہونے سے خطے کے امن کو خطرہ ہے، کشمیر کے حوالے سے سلامتی کونسل کی قراردادوں پر عمل درآمد ہونا چاہیے۔
شہباز شریف کا کہنا تھا کہ سلامتی کونسل افغانستان سے فتنہ الخوارج اور داعش کی دہشتگردی پر توجہ دے۔
