لاہور، وزیر اعلیٰ پنجاب مریم نواز شریف کا کہنا ہے کہ تھیٹر کو بحال کرکے فن و ثقافت کے فروغ کا مؤثر ذریعہ بنایا جائے گا۔
تھیٹر کے عالمی دن کے موقع پر اپنے پیغام میں وزیر اعلیٰ پنجاب مریم نواز شریف نے کہا کہ تھیٹر معاشرتی اقدار اور روایات کی عکاسی کے ساتھ ساتھ شعور اجاگر کرنے کا اہم ذریعہ ہے۔ مہذب اور ترقی یافتہ معاشروں میں معیاری تھیٹر کو نمایاں حیثیت حاصل ہوتی ہے۔
انہوں نے کہا کہ پنجاب حکومت تھیٹر کی بہتری اور ترقی کے لیے عملی اقدامات کر رہی ہے، اس فن کو معیاری اور بامقصد تفریح کا ذریعہ بنانے پر توجہ دی جا رہی ہے، جبکہ فنکاروں کی معاونت کے لیے آرٹسٹ فنڈ بھی قائم کر دیا گیا ہے۔
مریم نواز کا مزید کہنا تھا کہ فن اور فنکاروں کی فلاح و بہبود حکومت کی ترجیحات میں شامل ہے، تھیٹر کی بحالی سے فن و ثقافت کو مزید فروغ دیا جائے گا، جو پاکستان کے مثبت تشخص اور تہذیبی ورثے کو اجاگر کرنے میں معاون ثابت ہوگا۔
دوسری جانب وزیراعظم کے مشیر رانا ثناءاللہ کا کہنا ہے کہ وزیراعظم نے پیپلز پارٹی کو یقین دہانی کرائی ہے کہ 6 کینالز کے معاملے پر باہمی مشاورت سے بات چیت کی جائے گی، اور جو بھی متفقہ فیصلہ ہوگا، اس پر عمل درآمد یقینی بنایا جائے گا۔
