بالی ووڈ کے معروف ہدایتکار اور پروڈیوسر کرن جوہر نے حالیہ انٹرویو میں بتایا کہ یہ سوچ بالکل غلط ہے کہ لڑکے نہ روئیں۔
گلابی رنگ نہ پہنیں یا نرم مزاج نہ رکھیں۔ انہوں نے کہا کہ تقریباً 50 فیصد میری شخصیت آج بھی میرے بچپن کی یادوں سے متاثر ہے۔
کرن جوہر نے کہا کہ وہ اپنے بچوں یاش اور روہی کی پرورش اس طرح کر رہے ہیں کہ وہ کسی صنفی معیار کی قید میں نہ آئیں۔ اپنے بچپن کے جذباتی صدمات اور والد بننے کے بعد پیدا ہونے والی بے چینی کے حوالے سے بات کرتے ہوئے انہوں نے بتایا کہ ان کا بچپن جذباتی چیلنجز سے بھرا ہوا تھا، جس کا اثر آج بھی ان کی زندگی اور بچوں کی پرورش پر پڑتا ہے۔
چاہت فتح علی خان کا کرن جوہر کے لیے خصوصی پیغام
انہوں نے کہا کہ وہ اپنے بچوں کی معمولی باتوں پر بھی جلد پریشان ہو جاتے ہیں تاکہ وہ وہی تکلیف نہ برداشت کریں جو انہوں نے اپنی بچپن میں کی۔ وزن بڑھنے اور غیر صحت مند غذا دیکھ کر بھی وہ فوراً فکر مند ہو جاتے ہیں، یہاں تک کہ بچوں کو چینی کھاتے دیکھ کر بھی وہ ناراض ہو جاتے ہیں۔
کرن جوہر نے بتایا کہ بچپن میں موٹاپے کی وجہ سے انہیں مزاح اور طنز کا سامنا کرنا پڑا، جس کی وجہ سے آج بھی جسمانی کمی بیشی کو لے کر وہ بعض اوقات غیر محفوظ محسوس کرتے ہیں۔ وہ کئی بار اپنے کپڑوں کے انتخاب میں بھی خود کو محدود محسوس کرتے ہیں، مگر اب آہستہ آہستہ اپنی شخصیت کو قبول کرنا سیکھ رہے ہیں۔
