معروف پاکستانی اداکارہ اور ماڈل ہانیہ عامر کو اقوامِ متحدہ پاکستان کی جانب سے نیشنل گڈ وِل ایمبیسیڈر (قومی خیرسگالی سفیر) مقرر کر دیا گیا ہے۔
یہ تقرری خواتین کے حقوق، صنفی مساوات اور خواتین کو بااختیار بنانے کے مقصد سے کی گئی ہے، جہاں ہانیہ عامر ان موضوعات پر آگاہی اور شعور اجاگر کرنے میں اپنا کردار ادا کریں گی۔
اقوامِ متحدہ کے اعلامیے کے مطابق ہانیہ عامر اپنی شہرت، اثر و رسوخ اور نوجوانوں میں مقبولیت کو مثبت تبدیلی کے لیے استعمال کریں گی۔ وہ معاشرے میں خواتین کو درپیش چیلنجز اور صنفی امتیاز کے خلاف آواز بلند کرنے میں اہم کردار ادا کریں گی۔
نئی ذمہ داری ملنے پر ہانیہ عامر نے خوشی کا اظہار کرتے ہوئے کہا کہ ہر لڑکی کو اپنے خوابوں کو حقیقت میں بدلنے کا حق حاصل ہے۔ ان کا کہنا تھا کہ وہ خواتین کی خودمختاری، تعلیم اور مساوی مواقع کے لیے کام کو اپنی اولین ترجیحات میں شامل رکھیں گی۔
امریکا میں اداکارہ ہانیہ عامر کی طبیعت ناساز، اسپتال میں داخل
واضح رہے کہ کچھ دن قبل ہانیہ عامر امریکا کے شہر ہیوسٹن میں ایک ایوارڈ تقریب کے دوران اچانک طبیعت خراب ہونے کے باعث اسپتال میں زیرِ علاج رہی تھیں، تاہم اب وہ مکمل طور پر صحت یاب ہو چکی ہیں اور دوبارہ اپنے کام میں مصروف ہو گئی ہیں۔
ہانیہ عامر کی اس نئی حیثیت سے نہ صرف ان کی سماجی خدمات کو تقویت ملے گی بلکہ یہ قدم پاکستان میں خواتین کے حقوق سے متعلق بحث کو مزید مضبوط بنیادوں پر آگے لے جانے میں مددگار ثابت ہوگا۔
