بنگلہ دیش نے ہندو انتہا پسندوں کی جانب سے ملنے والی دھمکیوں اور سکیورٹی خدشات کے پیشِ نظر بھارت کے لیے ویزا خدمات معطل کر دی ہیں۔
وزارت خارجہ بنگلہ دیش کے مطابق نئی پابندیاں جمعرات سے نافذ العمل ہیں اور اس کے تحت کاروباری اور ملازمت کے ویزوں کے سوا باقی تمام اقسام کے ویزے عارضی طور پر روک دیے گئے ہیں۔
خبر ایجنسی کے مطابق، بنگلہ دیش نے بھارت میں تین اہم سفارتی مشنز کے ویزا سیکشنز کو عارضی طور پر بند کرنے کا اعلان کیا ہے۔ ان میں کولکتہ میں بنگلہ دیشی ڈپٹی ہائی کمیشن کے ویزا اور قونصلر خدمات مکمل طور پر معطل ہیں، جبکہ ممبئی اور چنئی میں سیاحتی ویزے اور دیگر ویزا سہولیات بھی بند کر دی گئی ہیں۔
وزارت خارجہ نے کہا کہ یہ فیصلہ ان بھارتی شہروں میں پیش آنے والے سکیورٹی واقعات کے بعد کیا گیا، اور اس کا مقصد مکمل طور پر حفاظتی وجوہات کو مدنظر رکھنا ہے۔ اس سے قبل 22 دسمبر کو بنگلہ دیش نے نئی دہلی میں اپنے ہائی کمیشن، تریپورہ کے اگرتلہ میں اسسٹنٹ ہائی کمیشن، اور سلی گوڑی کے ویزا سینٹر میں ویزا اور قونصلر خدمات عارضی طور پر معطل کر دی تھیں۔
اس اقدام سے بھارت میں بنگلہ دیشی سفارتی مشنز کی ویزا خدمات محدود ہو گئی ہیں، جس سے دونوں ممالک کے شہریوں اور کاروباری افراد کے لیے سفری امور متاثر ہو سکتے ہیں۔ حکام نے شہریوں سے اپیل کی ہے کہ وہ ویزا یا قونصلر خدمات کے لیے مزید معلومات کے لیے مستند ذرائع سے رابطہ کریں۔
