وفاقی ادارہ شماریات کی جاری کردہ رپورٹ کے مطابق، ملک میں ہفتہ وار مہنگائی کی شرح میں 0.22 فیصد کمی دیکھی گئی ہے۔
وفاقی ادارہ شماریات کی جاری کردہ رپورٹ کے مطابق، ملک میں ہفتہ وار مہنگائی کی شرح میں 0.22 فیصد کمی دیکھی گئی، جبکہ سالانہ مہنگائی کی شرح 15.15 فیصد ریکارڈ کی گئی ہے۔ رپورٹ کے مطابق، پچھلے ہفتے 13 اشیائے ضرورت کی قیمتوں میں اضافہ ہوا، جبکہ 28 اشیاء کی قیمتوں میں استحکام رہا۔
رواں ہفتے جن اشیاء کی قیمتوں میں اضافہ ہوا، ان میں ٹماٹر، لہسن، مونگ کی دال، انڈے، آلو، گھی، لکڑی، اور سگریٹ شامل ہیں۔ تاہم، کچھ اشیاء کی قیمتوں میں کمی بھی دیکھنے میں آئی، جیسے کہ چکن، پیاز، گڑ، گندم کا آٹا، ماش کی دال، چینی، دال چنا، چاول، اور ایل پی جی۔
رپورٹ کے مطابق، ایک سال کے دوران گندم کا آٹا 32 فیصد، مرچ 20 فیصد، کوکنگ آئل 9 فیصد، چاول 8 فیصد، چینی 6 فیصد، انڈے 5.88 فیصد، گھی 4.74 فیصد، ڈیزل 17 فیصد، اور پیٹرول 13 فیصد تک سستا ہوا۔ جبکہ بجلی کے چھوٹے صارفین کے لیے ریٹ میں بھی 20.32 فیصد تک کمی کی گئی۔
دوسری طرف، سالانہ بنیادوں پر، دال چنا کی قیمت میں 82 فیصد، پیاز 50 فیصد، چکن 39 فیصد، دال مونگ 37 فیصد، خشک دودھ 25 فیصد، اور بیف 23 فیصد تک اضافہ ہوا ہے۔ مزید برآں، گیس کے نرخوں میں 570 فیصد، اور کپڑے و جوتوں کی قیمتوں میں 12 سے 17 فیصد اضافہ دیکھا گیا۔
