چیف جسٹس قاضی فائز عیسیٰ اور نئے تعینات ہونیوالے چیف جسٹس یحییٰ آفریدی کے درمیان اہم ملاقات ہوئی۔
اسلام آباد: چیف جسٹس قاضی فائز عیسیٰ اور نئے مقرر ہونے والے چیف جسٹس جسٹس یحییٰ آفریدی کے درمیان ایک اہم ملاقات ہوئی۔ ذرائع کے مطابق، یہ ملاقات چیف جسٹس کے چیمبر میں ہوئی جہاں چیف جسٹس قاضی فائز عیسیٰ نے جسٹس یحییٰ آفریدی کو نئی ذمہ داری سنبھالنے پر مبارکباد پیش کی، جس پر جسٹس یحییٰ آفریدی نے شکریہ ادا کیا۔
ذرائع نے مزید بتایا کہ جسٹس یحییٰ آفریدی نے مقدمات کی سماعت کے بعد بھی چیف جسٹس قاضی فائز عیسیٰ سے ایک اور ملاقات کی۔ پہلی ملاقات مقدمات کی سماعت سے قبل ہوئی تھی۔ جسٹس یحییٰ آفریدی نے جسٹس منصور علی شاہ کے چیمبر کا بھی دورہ کیا اور وہاں دیگر ججز سے ملاقات کی۔
اس موقع پر، چیف جسٹس یحییٰ آفریدی کو ان کے چیمبر کے سٹاف کی جانب سے بھی مبارکباد دی گئی۔ یاد رہے کہ صدر مملکت آصف علی زرداری نے جسٹس یحییٰ آفریدی کی بطور چیف جسٹس آف پاکستان تعیناتی کی منظوری دے دی ہے اور وزارت قانون نے ان کی تقرری کا باقاعدہ نوٹیفکیشن بھی جاری کر دیا ہے۔
