اسلام آباد، وزیراعظم پاکستان شہباز شریف کا کہنا تھا کہ آئینی ترمیم سے عوام کو عدالتی نظام سے جلد انصاف ملے گا۔
وفاقی کابینہ اجلاس میں گفتگو کے دوران وزیراعظم پاکستان نے کہا کہ 26 ویں آئینی ترمیم پاکستان کی ترقی اور خوشحالی کیلئے مؤثر ثابت ہوگی، آئینی ترمیم سے عوام کو عدالتی نظام سے جلد انصاف ملے گا اور جوڈیشل بینچ کے قیام سے عام آدمی کو سہولت ملے گی۔
وزیراعظم شہباز شریف نے کہا کہ 26 ویں آئینی ترمیم 2006 میں ہوئے میثاق جمہوریت کے ایک اور وژن کی تکمیل ہے، آئینی ترمیم پر حکومت میں شامل جماعتوں اور اپوزیشن جماعتوں کیساتھ طویل مشاورت ہوئی۔
شہباز شریف نے کہا کہ ترمیم میں مدد پر صدر مملکت زرداری، بلاول بھٹو اور مولانا فضل الرحمان کا شکرگزار ہوں جب کہ آئینی ترمیم کے حوالے سے عمل میں نوازشریف کی رہنمائی بھی حاصل رہی۔
وزیراعظم پاکستان کا کہنا تھا کہ ایس سی او کانفرنس پروفاقی دارلحکومت کو خوبصورتی سے سجایا گیا، چینی، روسی وزیراعظم اور دیگر نے اسلام آباد کی خوبصورتی کی تعریف کی، 11 سال بعد چینی وزیراعظم پاکستان آئے اور ان کا دورہ کامیاب ترین رہا۔
غزہ کی صورتحال پر بات کرتے ہوئے وزیراعظم شہباز شریف کا کہنا تھا کہ غزہ اور لبنان میں بربریت تاحال جاری ہے، بے گناہ خواتین اور بچوں کو بےدردی سے شہید کیا جارہا ہے اور ظلم میں کمی نہیں آرہی جب کہ عالمی عدالت کے فیصلوں کو ردی کی ٹوکری میں پھینک دیا گیا ہے۔
