209
وزیراعظم شہباز شریف سے بلاول بھٹو زرداری کی ملاقات، آئینی ترمیم کے حتمی مسودے پر تفصیلی مشاورت۔
اسلام آباد میں وزیراعظم شہباز شریف سے چیئرمین پاکستان پیپلزپارٹی بلاول بھٹو زرداری نے وفد کے ہمراہ اہم ملاقات کی۔ ذرائع کے مطابق اس ملاقات میں مجوزہ 26ویں آئینی ترمیم کے حتمی مسودے پر مشاورت ہوئی، جس میں رات دیر گئے ہونے والی سیاسی ملاقاتوں کے تناظر میں مسودے میں ممکنہ تبدیلیوں پر بھی غور کیا گیا۔
ملاقات میں اٹارنی جنرل منصور عثمان اعوان بھی شامل تھے، جبکہ موجودہ سیاسی صورتحال پر تبادلہ خیال کیا گیا۔ اس موقع پر نائب وزیرِاعظم اسحاق ڈار، وزیرِ قانون اعظم نذیر تارڑ، پیپلزپارٹی کی جانب سے شیری رحمان، سید نوید قمر، اور مرتضی وہاب بھی موجود تھے۔
بعد ازاں، وزیراعظم سے ملاقات کے بعد بلاول بھٹو مولانا فضل الرحمان سے ملاقات کے لیے ان کی رہائش گاہ پر پہنچ گئے، جہاں انہوں نے آئینی ترمیم کے حوالے سے مزید مشاورت کی۔
