اسپیکر قومی اسمبلی سردار ایاز صادق نے چینی وزیر اعظم لی چیانگ سے ملاقات کی، ملاقات میں قومی اسمبلی اور چینی پارلیمان کے درمیان روابط کے فروغ پر تبادلہ خیال ہوا۔
اسلام آباد میں سپیکر قومی اسمبلی سردار ایاز صادق نے چین کے وزیراعظم لی چیانگ سے ملاقات کی، جس میں دونوں ممالک کے درمیان پارلیمانی روابط کو بڑھانے اور تجارتی تعلقات میں مزید وسعت دینے پر اتفاق ہوا۔ ملاقات کے دوران علاقائی امن و استحکام کے لیے مشترکہ کوششوں اور توانائی کے شعبے میں مشترکہ منصوبوں کی اہمیت پر بھی بات چیت ہوئی۔
سردار ایاز صادق نے اس موقع پر کہا کہ شنگھائی تعاون تنظیم (ایس سی او) کے اجلاس کی میزبانی پاکستان کے لیے اعزاز ہے، اور اس فورم سے علاقائی تعاون اور استحکام کو فروغ ملے گا۔ انہوں نے کہا کہ پاکستان ایس سی او کے پلیٹ فارم کو بہت اہمیت دیتا ہے، جس سے عالمی سطح پر پاکستان کا مثبت تاثر اجاگر ہوگا اور علاقائی ترقی میں کردار ادا کیا جائے گا۔
پاک چین اقتصادی راہداری (سی پیک) کے منصوبوں کو خصوصی اہمیت دیتے ہوئے، سردار ایاز صادق نے کہا کہ پاکستان میں مختلف شعبوں میں سرمایہ کاری کے وسیع مواقع موجود ہیں، اور تعلیمی و سائنسی تعاون بڑھانے کی ضرورت ہے۔ انہوں نے ٹیکنالوجی اور ڈیجیٹل معیشت میں تعاون کی اہمیت کو اجاگر کیا جس سے پاکستانی عوام کو فائدہ پہنچے گا۔
سپیکر قومی اسمبلی نے چین کو پاکستان کا اسٹریٹجک شراکت دار قرار دیتے ہوئے مستقبل میں دونوں ممالک کے تعاون کو مزید فروغ دینے کا عزم ظاہر کیا۔ انہوں نے پارلیمانی سطح پر تعاون بڑھانے اور مستقبل میں پارلیمانی وفود کے تبادلے کو فروغ دینے کی بھی بات کی۔
