لاہور، پنجاب کے 8 شہروں میں فوری طور پر 3 روز کے لیے دفعہ 144 نافذ کردی گئی۔
محکمہ داخلہ پنجاب کی جانب سے 8 اضلاع میں دفعہ 144 کے نفاذ کا نوٹیفکیشن جاری کر دیاگیا۔ جاری کردہ نوٹیفکیشن کے مطابق پنجاب کے 8 شہروں ملتان، ساہیوال، سرگودھا، گوجرانوالہ، وہاڑی، پاکپتن، اوکاڑہ اور وزیرآباد میں دفعہ 144 نافذ کردی گئی ہے۔
دفعہ 144 کا اطلاق جمعرات 10 اکتوبر سے ہفتہ 12 اکتوبر تک ہو گا، دفعہ 144 کے نفاذ کا فیصلہ متعلقہ ضلعی انتظامیہ کی درخواست پر کیا گیا ہے۔
ترجمان محکمہ داخلہ پنجاب کے مطابق متعلقہ اضلاع میں ہر قسم کے سیاسی اجتماعات، دھرنے، جلسے، مظاہرے، احتجاج اور ایسی تمام سرگرمیوں پر پابندی عائد ہوگی۔
سکیورٹی خطرات کو مدنظر رکھتے ہوئے عوامی اجتماع دہشت گردوں کیلئے سافٹ ٹارگٹ ہو سکتا ہے۔
ترجمان کے مطابق امن و امان کے قیام، انسانی جانوں اور املاک کے تحفظ کیلئے متعلقہ اضلاع میں دفعہ 144 کے نفاذ کے احکامات جاری کیے گئے ہیں۔
واضح رہے کہ پی ٹی آئی کی جانب سے 11 اکتوبر کو ملتان اور ساہیوال جبکہ 12 اکتوبر گوجرانوالہ اور سرگودھا میں احتجاج کی کال دی گئی ہے۔
