راولپنڈی، سابق وزیراعظم عمران خان کی ہمشیرہ علیمہ خان کا کہنا تھا کہ بانی پی ٹی آئی کی رہائی کیلئے ہمارے پاس احتجاج کے علاوہ کوئی راستہ نہیں۔
راولپنڈی اڈیالہ جیل کے باہر میڈیا سے گفتگو کے دوران علیمہ خان نے کہا کہ سابق وزیراعظم نے آج کہا ہے کہ احتجاج کبھی روکا نہیں جاتا نہ پرسوں رکنا چاہیے تھا۔
عمران خان کی ہمشیرہ کا کہنا تھا کہ عمران خان کو اگر جیل سے نکالنا ہے اور اس ظلم کو ختم کرنا ہے تو پُرامن احتجاج جاری رکھنا ہوگا، اگر ہم پُرامن احتجاج نہیں کریں گے تو وہ عمران خان کو رہا کرنے کے بعد فوجی جیل میں ڈال دیں گے۔
علیمہ خان نے کہا کہ راولپنڈی کے عوام اپنی اور عدلیہ کی آزادی کیلئے پرامن احتجاج کیلئے نکلے تھے، سامنے پولیس نہیں تھی کالے کپڑوں میں کوئی سپیشل یونٹ تھا جو لوگوں پر ربڑ کی گولیاں برسا رہا تھا۔
رہنما پی ٹی آئی کا کہنا تھا کہ ہمیں سابق وزیراعظم اور عدلیہ آزاد چاہیے، ہمارا پُرامن احتجاج جاری رہے گا یہ نہیں رکے گا، اس کے علاوہ بانی پی ٹی آئی اور کارکنان کی رہائی کا کوئی راستہ نہیں۔
