راولپنڈی، سابق وزیراعظم پاکستان عمران خان کی جانب سے سابق ڈی جی آئی ایس آئی لیفٹیننٹ جنرل ریٹائرڈ فیض حمید کے اوپن ٹرائل کا مطالبہ کر دیا گیا ہے۔
اڈیالہ جیل میں صحافیوں سے غیر رسمی گفتگو کے دوران بانی پی ٹی آئی عمران خان کا یہ کہنا تھا میں مطالبہ کرتا ہوں جنرل (ر) فیض حمید کا اوپن ٹرائل ہونا چاہیے، اوپن ٹرائل میں میڈیا کو کوریج کی بھی رسائی دی جائے۔
بانی پی ٹی آئی کا یہ کہنا تھا جنرل (ر) فیض حمید کے اوپن ٹرائل سے ملک کا فائدہ ہوگا اور پاکستان مزید ترقی کرے گا۔
واضح رہے کہ چند روز قبل آئی ایس پی آر نے اپنے جاری کردہ بیان میں یہ بتایا تھا کہ فوج کے قوانین کی خلاف ورزی پر سابق ڈی جی آئی ایس آئی جنرل (ر) فیض حمید کو حراست میں لیکر ان کے کورٹ مارشل کی کارروائی شروع کر دی گئی تھی۔
سابق وزیراعظم نے اس حوالے سے اپنے بیان میں یہ کہا تھا کہ فیض حمید کی گرفتاری سے مجھے کوئی خوف نہیں، یہ پاک فوج کا اندرونی معاملہ ہے۔
عمران خان کا اس حوالے سے یہ کہنا تھا کہ مجھے اندر کرنے کے لیے سابق ڈی جی آئی ایس آئی کا ڈرامہ رچایا جا رہا ہے، فیض حمید سے بیان دلوا کر مجھے ملٹری کورٹ کی طرف لے جانے کی کوشش کی جاری ہے۔
