عدالت نے بانی پاکستان تحریک انصاف اور بشریٰ بی بی کی درخواستوں پر جلد سماعت کی استدعا منظور کرلی۔
اسلام آباد ہائی کورٹ کے قائم مقام چیف جسٹس سرفراز ڈوگر اور جسٹس انعام امین منہاس نے 190 ملین پاؤنڈز کیس کی سماعت کی، جس میں عدالت نے بانی پاکستان تحریک انصاف اور انکی اہلیہ بشریٰ بی بی کی درخواستوں پر جلد سماعت کرنے کی استدعا منظور کرتے ہوئے عدالت نے اپیلیں 2 ہفتوں میں مقرر کرنے کی ہدایت کردی۔
عدالت نے درخواستیں مقرر کرنے کی ہدایت جاری کرتے ہوئے کہا کہ بانی پی ٹی آئی اورانکی اہلیہ بشریٰ بی بی کی سزا معطلی کی درخواستیں ایک ساتھ دیکھ لیں گے۔
اس موقع پر بانی پاکستان تحریک انصاف کی جانب سے وکیل ظہیر عباس ایڈووکیٹ اور عثمان گل پیش ہوئے جب کہ انکی اہلیہ بشریٰ بی بی کی جانب سے وکیل علی بخاری ایڈووکیٹ عدالت میں پیش ہوئے۔
دورانِ سماعت وکیل علی بخاری ایڈووکیٹ نے عدالت سے استدعا کی کہ سزا معطلی کی درخواستیں بھی مقرر کرنے کی تاریخ دے دیں، جس پر قائم مقام چیف جسٹس سرفراز ڈوگر نے کہا کہ ڈویژن بینچ نے کیسز مقرر کرنے سے متعلق جوڈیشل آرڈر جاری کر دیا ہے۔ ہم سزا کیخلاف اپیلوں کے ساتھ سزا معطلی کی درخواستیں دیکھ لیں گے لیکن جوڈیشل آرڈر کے بعد ہم ڈائریکٹ کوئی تاریخ نہیں دے سکتے۔
واضح رہے کہ پاکستان تحریک انصاف کے بانی 14 سال جبکہ انکی اہلیہ بشری بی بی 7 سال کی سزا کاٹ رہے ہیں جبکہ عدالت میں درخواستیں دائر کررکھی ہیں جس میں عدالت سے استدعا کی گئی ہے کہ انکی درخواستوں پر جلد سماعت کی جائے۔
