اسلام آباد میں مسلم لیگ ن یوتھ ونگ سے خطاب کرتے ہوئے وفاقی وزیراطلاعات عطا تارڑ نے پاکستان تحریک انصاف (پی ٹی آئی) اور خیبرپختونخوا حکومت کو تنقید کا نشانہ بناتے ہوئے کہا کہ ہم 9 مئی والے نہیں ہیں جنہوں نے اپنی سیاست کیلئے ملک کے دفاعی اداروں اور شہدا کی یادگاروں پر حملہ کیا۔ بلکہ ہم 28 مئی والے ہیں۔
انہوں نے کہا کہ کیپٹن کرنل شیر خان شہید کے مجسمے کی توہین کرنے والے اس ملک کے دشمن ہیں۔ ہم نے کیپٹن کرنل شیر خان شہید کے مزار پر جاکر حاضری دی اور انکے بھائی انور لالہ سے ملاقات کی اور کیپٹن شیر خان شہید کے مجسمے کی توہین پر ان سے معذرت کی۔
عطا تارڑ نے خیبرپختونخوا حکومت کو تنقید کا نشانہ بناتے ہوئے کہا کہ پشاور دھماکوں کے نمونے آج بھی فارنزیک کے لیے لاہور بھیجے جاتے ہیں، پی ٹی آئی 11 سال میں خیبرپختونخوا میں سی ٹی ڈی، فارنزک لیب تک نہ بنا سکی، جبکہ این ایف سی ایوارڈ کے اربوں روپے خیبرپختونخوا میں ضایع کیے گئے۔
وفاقی وزیراطلاعات کا مزید کہنا تھا کہ پی ٹی آئی والے نہ ملک سے مخلص ہیں اور نہ ہی پارٹی سے پی ٹی آئی گروپ بندی کا شکار ہوچکی ہے۔
عطا تارڑ کا کہنا تھا کہ شہباز شریف کی قیادت میں ملک ترقی کی راہ پر ہے۔ آج عالمی ادارے بھی ملکی معیشت کی تعریف کر رہے ہیں۔ آرمی چیف جنرل عاصم منیر معیشت کی بحالی میں حکومت کے ساتھ کھڑے ہیں۔
فاقی وزیراطلاعات نے ملکی کامیابیوں کا ذکر کرتے ہوئے کہا کہ 12 ممالک کے وزرائے اعظم کی پاکستان آمد، پاکستان میں ایس سی او اجلاس کا انعقاد اور چیمپئنز ٹرافی کا کامیاب انعقاد اس بات کا ثبوت ہے کہ ملک ترقی کی راہ پر چل چکا ہے۔
