لاہور، صدر مسلم لیگ ن و سابق وزیراعظم میاں نواز شریف کا کہنا ہے کہ معاشی بہتری اور مہنگائی میں کمی ملک و قوم کے لیے اچھے اشارے ہیں۔
لاہور میں صدر مسلم لیگ (ن) میاں نواز شریف اور وزیراعلیٰ پنجاب مریم نواز سے ارکان پنجاب اسمبلی کی جانب سے ملاقات کی گئی، جس میں ملک کی مجموعی صورتحال، پنجاب میں جاری ترقیاتی عمل اور عوامی خدمت کے منصوبوں پر غور کیا گیا۔
اس موقع پر گفتگو کے دوران ن لیگی صدر میاں نواز شریف نے کہا کہ نیت ٹھیک ہو تو اللہ تعالیٰ کی مدد آتی ہے، عوام کی خدمت سب سے بڑی عبادت ہے اور اس کا صلہ اور انعام اللہ ہی دیتا ہے۔
سابق وزیراعظم کا کہنا ہے کہ معاشی بہتری اور مہنگائی میں کمی ملک و قوم کے لیے اچھے اشارے ہیں، 30 ہزار پر آنے والی سٹاک ایکسچینج آج ایک لاکھ 20 ہزار پوائنٹس کی حدوں کو چھو رہی ہے جو معاشی ترقی کے تسلسل کا ثبوت ہے۔
میاں نواز شریف نے کہا کہ وزیراعظم شہباز شریف بڑی محنت کر رہے ہیں اور اداروں و نظام کی اصلاح پر ٹھوس پیشرفت جاری ہے، اللہ کا شکر ہے پاکستان کا تنزلی کی طرف سفر رک گیا ہے۔
دوسری جانب رہنما تحریک انصاف سلمان اکرم راجہ کا کہنا ہے کہ سربراہ جے یو آئی (ف) مولانا فضل الرحمان نے 26ویں آئینی ترمیم میں ووٹ دیا یہ انکی سیاست ہے، ہم آج بھی 26 ویں ترمیم کی مخالفت کرتے ہیں۔
اسلام آباد جوڈیشل کمپلیکس میں میڈیا سے گفتگو کے دوران پی ٹی آئی رہنما سلمان اکرم راجہ نے کہا کہ ہماری ضمانتیں چلتی رہتی ہیں یہ ایک تلوار انہوں نے لٹکائی ہوئی ہے ہم مقابلہ کرتے رہیں گے، یہ جھوٹے کیسز ہیں، کل ہم صوابی جائیں گے ہر یونین کونسل میں لوگ احتجاج کریں گے۔
